Di Venezuela te Merca: Dos Rebelion cu a desafia e sistema di sclavitud

ORANJESTAD (AAN):  Durante su charla “Anhelo di Libertad: Sclavitud y Resistencia”, na Archivo Nacional Aruba,

Ramon Todd Dandare a duna di conoce cu na mei 1795 a tuma luga un insureccion di hende preto, pardo y catibo den e seronan di Coro.

Insureccion di hende preto na Coro na 1795

Na cabes di e movemento tabatin e sambo liber Jose Leonardo Chirinos. E otro figura sobresaliente di e rebelion tabata e homber preto Jose Caridad Gonzalez, hende culto y defensor di e derechonan di e catibonan.

Entre e propositonan di e rebelion tabatin: establece ley Frances (libertad, igualdad, fraternidad), elimina sclavitud y revoca diferente impuesto. E rebeldenan tabatin intencion di tuma e ciudad di Coro. Na caminda nan a asalta numeroso hacienda y nan a asesina varios hende blanco. A persigui nan y a domina nan; algun a muri, a captura otro y algun a logra scapa, entre nan Chirinos.

Na augustus nan a traicion’e, nan a hib’e Caracas, Corte Real a husg’e, hay’e culpabel y sentenci’e na morto na pal’i horca. A ehecut’e dia 10 di december 1796 den Plaza Mayor di Caracas, nan a pone su cabes den un haula di hero na caminda di Coro y nan a corta su mannan pone nan den sero. Nan a bende su casa y tres yiunan como catibo.

E sentencia ta mustra e firme determinacion di autoridad pa castiga severamente cualke intento di mina e orden estableci, specialmente ora ta trata di nada menos cu e regimen di sclavitud. Comunmente a interpreta e rebelion di Chirinos como un di e movementonan preindependentista, sinembargo su propositonan tabata mucho mas profundo: tabata trata, sin duda, di un insureccion social contra e yugo teribel di sclavitud.
Insureccion di Southampton (tambe conoci como Rebelion di Catibo di Nat Turner)

El a tuma luga na Southampton County, Merca, na augustus 1831. El a haya su nomber di e lider di e movemento, Nat Turner, un catibo kende su actuacion tabata e caso mas importante di resistencia contra e sistema di catibo Mericano prome cu Guera Civil. Turner a siña lesa y a desaroya un sintimento religioso profundo pa medio di cua e tabata bisa di ta ricibi mensahe di Dios y asina el a bira conoci pa e otro catibonan como E Profeta.

Na februari 1831 el a presencia un eclipse y a interpret’e como un mensahe pa rebeldia contra e shonnan. Ta trata di un rebelion efectua pa mas o menos cincuenta homber cu a bay plantacion pa plantacion pa libera e catibonan y mata e blanconan. Sinembargo, e intento no a dura mas cu dos dia, ya cu e doñonan di catibo a logra calma e rebelion y forsa Turner pa huy y captur’e dos luna despues den un moeras. Dia 5 di november 1831 nan a sentenci’e na morto y nan a horc’e un siman despues. Ainda tabata falta 35 aña prome cu Merca a aboli sclavitud. 

Riba potret: captura di Nat Turner y busto di José Leonardo Chirinos, lider di e insureccion, na Caujarao, Estado Falcon.