Di e forma aki candidatanan di Miss Youth a honra First Responders

ORANJESTAD (AAN): Diasabra anochi na Renaissance Conference Center, no obstante e blackout, a tuma lugar e certamen di Miss Youth Aruba 2021.

   Na e ocasion aki, cada candidata a subi escenario man teni cu un First Responder cu sigur a wordo admira masha hopi mes pa publico.  Riba escenaria por a mira presencia di Polis, Bombero, Docter, Paramedico, diferente Enfermero y personal di Servicio di Emergencia, y tambe personal di Cuerpo Especial Arubano.

   Cada candidata a relata un storia breve di cada uno di First Responders, di loke nan a topa cune ora cu e pandemia a bati na porta di e isla.  Algo cu a ser treci dilanti, ta loke kizas hopi hende no sa, esta cu e trabao no tabata djis hopi pisa riba e trahadornan aki, pero tambe e angustia cu nan ta laga nan famia na cas.  E temor cu e trahador no haya e virus y bin contagia su famia cune.  Otronan ta mira nan ser keri ta bay traha, y no sa si e ta regresa cas safe of no.

   DIARIO a keda hopi impresiona cu e seccion aki di e certamen, cu a trece pa publico un otro imagen y punto di bista di loke e crisis di Coronavirus a haci cu nos hendenan na Aruba.  Pabien na e organizadornan cu e idea hopi admirable aki.