Di dos KIES Camp di Plan di Mayor pa muchanan cu ta bin di mayornan separa of divorcia

Michelmira Arends :

ORANJESTAD (AAN): Plan di Mayor Aruba ta organisando su di dos edicion di KIES Camp cu lo tuma luga for di dia 3 pa 7 di augustus, for di 9:00 am te cu 12:00 pm. 

Coordinador na Plan di Mayor, Michelmira Arends den un entrevista recien a duna informacion di e programa cu lo tuma luga na YNZ Montessori Highschool na Kudawecha. 

KIES (Kinderen In Een Scheiding) ta un programa di intervencion di Plan di Mayor. Esaki ta e di dos edicion di KIES Camp y e aña aki e actividadnan ta entre otro: Korps Politie Aruba, Korps Brandweer Aruba, Kustwacht Caribisch Gebied, Ostrich Farm, Bon Nochi, Drumi Dushi, ArtisA, y hopi mas. 

Tin tres grupo cu lo participa na KIES Camp cu ta KIES-kleuter (edad 4-6 aña), KIES-kinderen (edad 7-12 aña) y KIES-jongeren (edad 13-17 aña). E camp ta exlusivo pa muchanan cu ta bin di mayornan cu ta separa of divorcia of ta den plan pa haci esakinan. Tambe, muchanan kende nan mayornan a fayece, ta biba cu un voogd of ta cay bou di un organisacion, por participa na KIES camp. 

Señora Arends a duna di conoce cu meta di e camp no ta solamente pa e muchanan goza di e actividadnan, sino pa nan haya un programa di intervencion unda cu nan por papia di nan emocionnan, situacion. Ta siña e muchanan con pa deal cu esakinan y pa nan por realisa cu nan no ta nan so, cu tin mas mucha cu ta bin di casnan na unda mayornan no ta hunto. 

Por registra via e link cu ta obtenibel riba website di Plan di Mayor. E prijs di camp ta Awg. 50,- pa mucha, pero tin e posibilidad cu esaki ta gratis pa mayornan cu no por paga e suma aki. Pago por wordo haci cash na MFA Santa Cruz 47, di dos piso. E siguiente fecha pa haci pago ta dia 27 di juli despues di 1:00 pm. Esnan cu no por paga riba e fecha menciona, por tuma contacto cu Plan di Mayor pa coordina esaki.