Di cada tres adulto mayor dos ta sufri di Alzheimer- Demencia, pesey e  proyecto “Cana Hunto cu Mi”

Mirian Illidge, Trahado Social di DAS:

ORANJESTAD (AAN) – Manera ta conoci, Diabierna anochi, a tuma lugar un charla tocante e tema di Demencia y Alzheimer yama: “Cana Hunto cu Mi”, cual ta un iniciativa di Departamento di Asunto Social (DAS).

            Señora Mirian Illidge, Trahador Social di DAS, a referi na e anochi informativo aki, y a splica lo siguiente: “Cana Hunto cu Mi, ta un proyecto cu a sali for di Departamento di Asunto Social, mirando e preocupacion cu ta reina pa cu adultonan mayor. Basa riba datanan adkiri nos a bin ripara cu e problematica di Alzheimer-Demencia ta un preocupacion hopi grandi cu ta reina den nos pueblo, y locual nos kier haci cu Cana Hunto cu Mi, ta laga pueblo sa cu ‘bo no ta bo so’! Nos ta dispuesto como Departamento di Asunto Social, hunto cu nos partnernan cu ta encarga cu e tematica di adultonan mayor, nos intencion ta pa hunto nos wanta man di nos ser keri, wanta man di e cuidadornan di nos grandinan, pa nos bin na un solucion. Nos ta di opinion cu tin biaha pa falta di conocemento di e problematica, ta pone ansia, preocupacion, miedo den nos famia. Esey ta locual nos kier elimina.

            Nos kier percura pa duna informacion corecto y ya nan por tin un tiki mas di trankilidad. Sa na unda nan por acudi pa haya e yudanza y informacion corecto. Nos ta realiza cu un di cada tres persona ta sufri di Alzheimer y Demencia, por ta bo bisiña, bo mama, bo tata, bo ruman y cada un ta sufriendo di demencia”, Mirian Illidge a relata.

            El a reitera cu e meta di e proyecto aki ta pa educa e pueblo, dun’e un man y e sabiduria pasobra Aruba tin e profesionalnan adecua pa yuda cu e problematica aki.

            Finalmente, el a menciona cu Aruba tin varios instancia cu ta traha cu e problematica aki, DAS mes tin tres oficina pa comunidad, na Paradera, Oranjestad y San Nicolas. Tambe tin Cas Marie, Centro di Memoria, Wet Gele Kruis, entre otro. Y tin e telefon 125 cu adultonan ora tin pregunta of ta sinti nan mes nan so. Y semper nan por yama DAS pa haya e informacion necesario.