Destruccion di 9 luz na Malmok ta algo inaceptable

ORANJESTAD (AAN):  Un biaha mas por a tuma nota cu hendenan sin escrupulo y cu no ta stima Aruba ni un tiki a comete destruccion riba e luznan cu ta ubica riba e 'boardwalk' di Malmok. 

E area aki ta uno cu recien a pasa den un proceso di embeyecimento y cu tanto pa local como pa turista ta masha gusta pa dal un caminata mainta, haci ehercicio of pa simplemente bay eynan pa wak e 'sunset'.

            Pero parce cu tin un grupito cu no gusta e progreso di Aruba y cu no tin turismo na pecho pasobra cada rato nan ta pasa y destrui e luznan aki un pa un, manera por mira riba e potret aki.  E acto di vandalismo aki ta pa di tantisimo biaha ta wordo registra.  E biaha aki ta 9 luz a wordo destrui.

            Ta masha tristo y sigur ta algo cu merece un investigacion. Kizas algun camara di algun di e propiedadnan eybanda lo por trece claridad riba esnan cu a comete vandalismo un biaha mas den e area aki di Malmok.

            Turistanan cu tabata cana den e area diadomingo tabata hopi asombra di mira e destruccion cometi.