Dia di Hende Muhe 2023 na vispera di Dia di Himano y Bandera
*Expertonan femenino di Reino na timon di e barco pa futuro
*E lucha pa Derecho di Voto di Hende Muhe y Status Aparte
ORANJESTAD (AAN) — Na caminda pa 18 di Maart 2023, Aruba ta conoce awe un dia historico di Hende Muhe.
Celebracion di Dia di Hende Muhe 2023, ta entrega un responsabilidad enorme na hende muhe cu awe ta parti di e comunidad di Aruba, cu tabata parti di e lucha internacional pa muhe por haya e oportunidad pa dirigi su pais y segura e futuro di e pais.
E situacion cu awe historia ta entrega Aruba ta uno cu sigur cerca tur hende muhe, mester ta motibo pa realisa, pakico e hende muhe a hiba un lucha tenaz, pa por a ocupa puestonan importante den un comunidad y comparti responsabilidad di e pais cu e ser masculino.
Awe na vispera di celebracion di Dia di Himno y Bandera di Aruba, di e momento cu e lucha Arubano pa autodeterminacion di e pais a bira logro na 1983, homber muhe ta uni pa como ciudadano cu e mes derecho, permiti “Aruba Dushi Tera” resona bou e bandera di Aruba, cu ta simbolo di e autonomia, e libertad, pa cual Aruba a lucha.
Siglo 20 por wordo considera mundialmente como e Siglo di emancipacion, e siglo den cual e luchanan pa e derechonan mas sagrado di hende y Pueblo, a culmina y a conoce triunfo.
E lucha di hende muhe den historia di mundo y Aruba, no ta un lucha pa hende muhe por haya derecho di manda riba hende homber.
E lucha di e ser femenino y tur cu kier a uni na e causa, no tabata basa riba e posibilidad pa e hende muhe por bebe burachi y perde mocion di moral.
E lucha di hende muhe tabata dirigi riba e derecho democratico di hende muhe pa por dicidi na mes grado cu hende homber riba e bienestar di e pais.
Importante den esaki tabata pa e muhe haya derecho di voto mescos cu mester tabata e caso cu tur hende homber sin importa nivel di nan entrada.
2023 ta marca un momento historico grandi y ta exigi na e generacion cu ta cuminsa despedi, pa entrega na hobennan cu ta encarga cu futuro, conocemento intimo di e historia mundial y nacional pa asina e hobennan comprende e deber y responsabilidad cu nan tin cu nan pais.
2023 a habri cu bishita real, cu a marca tambe e momento cu e futuro Reina di Aruba, Princesa Amalia y comunidad di Aruba a cera conoci cu otro.
Un Reina a cera conoci cu su responsabilidad di futuro enfrente e ciudadano di Reino Hulandes, miembro di e comunidad di Aruba segun Statuut cu a wordo cambia pa introduccion di Status Aparte.
Na 1983, e derecho igual cu realisacion di derecho general di voto a entrega na homber y muhe na Aruba, a culmina den Status Aparte cu a wordo refleha den e Parlamento propio di Aruba y e Gobierno propio di e pais.
Na timon di e Gobierno propio di pais Aruba, tin un Minister President di sexo femenino, cu hunto cu otro experto financiero femenino, mester percura pa duna contenido na e reforma financiero, economico y social di Aruba.
Pa supervisa e futuro nobo y e realidad di autonomia cu ta hancra den Statuut y Status Aparte, Aruba conoce e areglo di RaFT, cu a wordo negocia dor di e prome Prome Ministro femenino di Aruba, mr. Evelyn Wever-Croes cu asistencia directo di e Ministro di Asuntonan financiero di Aruba, mr. Xiomara Maduro.
CAFT ta e organo di supervision cu for di 2023 ta wordo dirigi dor di un experto femenino drs. Lidewijde Ongering mientras e Ministro Hulandes encarga cu asuntonan di Reino, drs.Alexandra van Huffelen.
Awe Dia di Hende Muhe ta topa cu culminacion di autonomia di Aruba hancra den Status Aparte, Himno y Bandera di Aruba, y e derecho sagrado di igualdad di e homber y muhe Arubano cu como experto por pone su mes na disposicion di su pais den construccion, den pesca, den agricultura, como tata, como mama, como maestro, como yiu, nieto , periodista, pa asina segura un pais di igualdad.
E bandera di Arubianismo, di e alma autonomo di Aruba, ta bula halto awe pa entrega na mundo otro ehempel: e hende muhe ta capaz pa carga tur responsabilidad!
