El a evita desmantelacion di refineria den programa di prome Gobierno
* Aruba y cambio dramatico di liderazgo di lucha pa Status Aparte
*Su papel importante a bay perdi den e totalidad di sucesonan na1985
ORANJESTAD (AAN) — Tur lucha tin nan lider, cu ta asina importante cu tin un teoria cu ta bisa, cu si e lider no ta existi mas, e lucha ta muri.
Den historia di e transicion di Aruba pa Status Aparte, poco biaha ta para keto na e papel cu destino a entrega na persona di Nelson Oduber, cu na entrada di 1985 mes no por a pensa, cu su papel den e realizacion di Status Aparte lo a cambia drasticamente y cu e lo mester a asumi e lugar di Betico Croes den e lucha pa un futuro estatal nobo pa Aruba.
E peso di e papel di Betico Croes den e cambio estatal di Aruba, tabata asina grandi cu hasta den historia, realmente nunca a papia di un persona cu por a reemplaza Betico Croes directamente como e lider cu Pueblo tabata mira den su persona.
Por hasta conclui cu si no tabata pa e grado di humildad enorme di Betico Croes den su participacion na comunidad Arubano, e expresion “lider”cu tabata e titulo popular di Betico Croes, lo a crea un barera entre Pueblo y Betico mes.
Den caso di Betico Croes el a solamente fortifica e exigencianan mara na su mision pa hiba Aruba na mas cu un futuro estatal nobo.
Nelson Oduber tabata forma parti directo di e team di Betico Croes den e proceso pa Status Aparte cu manera a wordo acorda na Conferencia di Mesa Redonda na 1983, lo a bira Prome di Januari 1986, cu a habri cu uno di e episodionan mas tristo cu historia di Aruba a entrega.
Durante e ultimo horanan prome cu Status Aparte a bira realidad, final di 1985 a entrega na historia di Aruba, un pagina cu nunca historia mes por interpreta manera mester ta.
Loke Aruba hamas por a idea a socede.
Historia di Status Aparte di Aruba a conoce un cambio total na momento cu su lider a accidenta y a cuminsa despedi di e Pueblo cu como ultimo regalo di Betico Croes, a ricibi Status Aparte.
Na e momento cu Betico Croes tabata despedi di Aruba, historia a entrega na Nelson Oduber e tarea inespera di acepta su parti di e herencia di Betico Croes, cu tabata duna continuidad na e lucha y asumi liderazgo di partido MEP, cuna di e lucha pa Status Aparte.
Durante momentonan di dolor nacional, Nelson Oduber a keda encarga cu e partido, cu e labor diario di Betico Croes den partido MEP, cu mester a duna contenido na e deseo pa nada stroba pa e lucha sigui.
Na e momento tambe, destino a transforma Nelson Oduber den e persona cu mester a ocupa e puesto di Betico Croes como lider diario di e partido cu na 1986 for di bankinan di oposicion mester a observa e gobernacion di Aruba na un forma completamente diferente di loke a wordo planea.
Mientras Betico Croes tabata lucha leu for di cas pa su bida, na su nomber Nelson Oduber mester a sigui duna direccion y entre otro enfrenta tendencianan nobo cu a surgi na Aruba manera e plan di e prome Gobierno di pais Aruba pa desmantela Lago pa asina haya placa pa sostene e situacion financiero di Aruba.
Na 1986, salida eterno di Betico Croes di Aruba, a comberti Nel Oduber den e lider nobo di MEP cu mester a duna continuacion na r maneho di Betico Croes, pero tambe lucha pa e parti material di Aruba, cu dor di e salida di Lago tabata den problema financiero.
Sinembargo Nelson Oduber, na e momento cu e ocasion a presenta, a habri caminda pa mantencion di e refineria cu entrada di compania nobo pa maneha Lago den un tempo sumamente dificil.
Ta e lucha di Nel Oduber a haci cu refinerianan a sigui demostra interes na Aruba cu a conoce hasta e historia di Citgo.
Sin duda Aruba mester duna mas atencion na figura di Nelson Oduber y otro lidernan prominente cu no ta busca publicidadpa nan mes pero cu a coy e bandera y a sigui lucha na salida eterno di Betico Croes.
