Relacionista Publico di DIMP, Meverly Romano:
- Pa despues di September tin solamente 54
ORANJESTAD (AAN) Relacionista Publico di Departamento di Impuesto di Aruba (DIMP), señora Meverly Romano, den conferencia di prensa reciente, a menciona e cantidad di citanan registra entre 11 di December 2024 te 21-Januari 2026, cu ta 33.606. Señora Romano a sigui splica cu, poco poco, DIMP a keda aumenta e cantidad di citanan te despues di Juli cu e cantidad a cuminza baha.
“Na Juni nos tabata tin un peak di 4.881 cita cu nos a atende, pa nos por a yuda mas tanto posibel di nos contribuyentenan, pa nos por ricibi nan plachinan di number. Despues di Juli nos ta mira un cambio, cu e cantidad a baha, pasobra nos a compromete nos mes cu e contribuyentenan, cu nos kier a caba di parti e plachinan pero den e prome seis lunanan di aña 2025, keriendo tambe cu nos contribuyentenan lo a busca cinco maximo pa cada cita, pero esey no tabata e caso; di nos experiencia no ta tur persona ta busca cinco plachi. Un promedio di tres plachi pa persona a wordo parti”, señora Romano a señala.
El a agrega cu door di esey tambe hopi mas hende ta haci cita. Den e caso ey, dos di esey tambe bo ta haya mas hopi hende ta haci cita. “Nos tabata tin masha hopi persona ‘uno-uno’, dus un cita un plachi, un cita un plachi, pues e ora ey bo tin mas hopi cita cu ta bin acerca y p’esey tambe e periodo a keda expande of extendi, te aworaki cu nos ta bezig. Despues di Juli, e cantidad a cuminza baha. Na Augustus nos a registra 3.776, September nos ta bezig aworaki cu e ultimo masa cu nos tin riba mil, cu ta 1.497 y despues di September nos tin solamente 54 cita di October registra, November nos tin 13, December nos tin seis y Januari nos tin 7”, Relacionista Publico di DIMP, Meverly Romano, a duna di conoce.
