Despues di 5 aña hopi dificil a logra negosha un contrato cu Canadian Bank Note na beneficio di deporte

Minister Dangui Oduber

ORANJESTAD (AAN): Na momento cu Minister Dangui Oduber a drenta gobierno na aña 2017, un di su prome obhetivonan tabata pa renegocia e contract cu Canadian Bank Note (CBN). E reparticion no tabata uno husto caminda Canadian Bank Note despues di paga premionan y gastonan operacional ta keda cu 12 miyon y deporte ta keda cu 4 miyon.

            Na aña 2017 despues cu AVP a perde eleccion a prolonga e nombracion di miembronan Raad van Toezicht (RVT) cu 4 aña. Esaki a haci cu a bira nan di 3 periodo cual ta algo cu totalmente en pugna contra reglanan di bon gobernacion.

            Minister Oduber a dicidi di manda un carta di retiro pa activistanan di partido AVP cu tabata forma parti di e RVT pa asina por nombra un RVT cu si kier y ta dispuesto pa negosha cu e Canadesnan.

            Consecuentemente Minister Oduber a bai corte y den corte huez a para na banda di e miembronan di RVT y como tal Minister Oduber NO por a retira nan. E RVT aki di activistanan di AVP a secuestra Fundacion Lotto Pa Deporte pa 5 aña y tabata na aña 2021 cu nan periodo a yega su final cu colega minister Endy Croes a haya e oportunidad pa nombra su representantenan. Nos ta contento di mira cu e RVT nobo nombra pa minister Croes si tabata dispuesto pa sinta cu CBN y renegocia e contrato cu CBN cual a logra cu exito.

            Un palabra di pabien na colega Minister Endy Croes cu e bunita logro aki cu sigur lo bay contribui na hopi desaroyonan positivo na bienestar di deporte y nos deportistanan. Nos ta mira cu e vision di partido MEP pa mehora infrastructura y percura pa facilidadnan haya artificial turf lo bira realidad.