Despues cu Pro Tech a haci ganashi cu loonsubsidie kier dicidi riba e CAO cu tin den negociacion

Comisario Huridico di SEPPA ta splica:

ORANJESTAD (AAN) – Trahadornan di Pro Tech tambe a confronta un conflicto laboral y nan tabata tin un accion di protesta, Diabierna di e siman aki.

Tabata presente e Comisario Huridico di SEPPA, ken a duna di conoce cu nan ta bezig pa hopi tempo caba, pa wak si por logra un Contrato Colectivo pa e trahadornan di Pro Tech, pero nan a yega na un punto unda e asunto a pega, den sentido cu Pro Tech ta kere cu nan por dicidi cual di e miembronan por bay den e CAO y ken no.

Esaki, el a bisa, ta absolutamente inaceptable, pasobra e sindicato ta negocia pa tur su miembronan y no pa un parti si, un parti no. E sindicato ta negocia cu Pro Tech pa e trahador, y hasta den 2020, aña di e pandemia, Pro Tech a haci ganashi.

Nan a bisa cu esey ta a base di a haya loonsubsidie, pero e trahadornan aki a traha 70-80-90% menos di salario, y aparentemente e compania a haya ganashi cu loonsubsidie pero a costo di e trabao di e trahado cu a entrega di nan salario. Y awo cu e sindicato ta bezig negociando un CAO, e compania ta bisa cu nan por duna “tanto” solamente, pasobra nan no a sali for di e pandemia, y tin diferente punto cu tin cu wak, entre otro, nan competencia.

SEPPA ta haya cu si nan tabata tin un tiki sentimento pa e trahador, na final di 2020 caba pa mitad di 2021, nan lo a duna algo na e trahado door cu nan a haya ganashi door di loonsubsidie y eigenlijk tabata cen di e trahado mes, pero esey no a sosode.

Aworaki, na 2022, SEPPA ta bezig cu CAO, nan a gana e referendum, pero aworaki Pro Tech ta bin cu exigencia y e kier dicidi kico e trahado ta acepta y kico no, pero e esey no ta bay asina.