Despedida di un docente pensionado cu a yuda alumnonan gradua toch den 2025

El a bay duna yudansa debi na scarcedad

ORANJESTAD (AAN): Dialuna anochi na momento cu tres klas di Abraham de Veerschool MAVO a tene nan ceremonia di graduacion den Las Palmas Ballroom di Holiday Inn Beach Resort, e dinamico directora Jane Bueno-Hooft a relata un storia di loke a pasa cu nan, ora cu pa cierto motibo nan docente cu ta duna les di fisica (‘Natuurkunde’) no por a sigui durante aña.

   Esaki no a socede cu djis ‘Natuurkunde’, pero tambe cu otro vaknan na scol.  Aki a menciona e.o. cu e vak Hulandes.  Sinembargo docentenan di e scol mes a duna un man pa asina cubri e deficit aki, y a yuda cu Hulandes.

   Sinembargo pa e vak di Natuurkunde nan a keda basta perhudica, y no tin mas docente di esey na Aruba cu por duna un man.  Pues dado momento tabata parce cu esnan cu tin esey den nan packet di examen lo no por logra.

   Aki ta unda cu un yudansa grandi a drenta den persona di Winston Ho Sing Loy, un docente kende sinembargo ya ta disfrutando di su pensioen.  El a mira e importancia di duna un man, pasobra no por laga tur alumno druip djis debi cu no tin leraar di Natuurkunde.

   Pues ata meneer Ho Sing Loy bek dilanti klas, pa yuda e alumnonan cu e vak di Natuurkunde.  Y su sosten ta loke a yuda cu alumnonan por a slaag, y cu Abraham de Veerschool MAVO a logra un porcentahe di 86% di graduado.

   Pero e biaha aki si, meneer Ho Sing Loy a indica cu awor si e ta bay sigui disfruta di su pensioen, y su dianan di para dilanti klas a yega su fin.  Durante e anochi aki, meneer Ho Sing Loy a wordo yama dilanti, y bao di fuerte aplauso di publico, el a ricibi un bunita regalito for di man di directora Jane Bueno-Hooft, kende a duna tur clase di elogio na meneer di Natuurkunde cu a rescata tur e alumnonan.

   DIARIO tambe ta desea na expresa palabra di danki na meneer Ho Sing Loy, kende a ‘Step up to the Plate’ pa duna un man.