Posicion fuerte di PPA tabata dicidi pa Gobierno Antiano
ORANJESTAD(AAN)- Diamars 14 di Maart Aruba a wordo informa cu Jacobo (Coby) Alders a despedi.
Coby Alders ta parti di e momentonan politico extraordinario, cu a habri caminda pa e realidad estatal actual di Aruba.
Riba e caminda pa autonomia di Aruba ta topa cu varios forma cu a trata di duna contenido na e anhelo pa futuro di e Arubiano durante Siglo 20, ora Aruba a skirbi un historia politico fascinante.
Pa despedi awe di uno di e integrantenan importante di historia moderno di Aruba, mester bolbe na e anhelo Arubano pa e pais por dicidi pa su mes y no ta parti mas di un colonia Hulandes cualifica como “De West” forma pa islanan den lama di Caribe.
Coby Alders tabata parti di e partido PPA cu a wordo funda dor di Juancho Irausquin na 1949.
Irausquin a separa di AVP a base di e Interim Regering cu AVP a sostene, cu a cambia e posicion di Aruba enfrente Curacao den di 8-8 pa 12-8 loke a nifica un posicion poderoso pa Curacao.
PPA a nace como Partido Social Democrat y na forma rapido a alcansa popularidad na Aruba.
Economia di Aruba tabata e punto importante di accion di PPA, cu hunto cu e partidonan Democrat di Curacao, Bonaire y Islanan Ariba a forma e cadena di gobernacion central pa un periodo largo.
Den e tempo e resultado electoral di PPA na Aruba tabata asina fuerte, cu e cantidad di asiento di PPA den Parlamento di Antia a sostene gobernacion di e cadena Democrat di Antia.
E triunfo di PPA na Aruba tabata e sosten grandi pa e cadena di Partidonan Democrat na Antia, cu a resulta den e plannan pa un Federacion Antiano pa reemplasa Antia Hulandes.
Entrada di MEP a trece cambio den e panorama politico di Aruba cu e lucha pa Status Aparte.
Coby Alders den e desaroyonan politico na Aruba, a ocupa cantidad di funcion politico activo na Aruba.
E tabata Diputado di Aruba y a gosa hopi popularidad como Ministro Plenipotenciario na Den Haag, Hulanda.
DIARIO ta extende su condolencia na su famia y amigonan.
