Skirbi pa Vi Frank Jr., hunto cu su ocho cursista:
ORANJESTAD (AAN)-- Manera cu DIARIO a trece recien dilanti, den sala di actividad di Biblioteca Nacional a tuma lugar e presentacion oficial di Buki Maraca, cu ta un coleccion di storia y poesia na Papiamento, skirbi pa ocho cursista cu a haya les di Vi Frank Jr.
Vi Frank a conta, den entrevista cu DIARIO, cu e ta un persona cu semper a gusta skirbi, for di tempo cu e tabata mucha. Semper el a gusta lesa buki y wak hopi pelicula, anto tempo cu e tabata tin un coleccion di storia cu el a skirbi, na aña 2020 pero net prome cu e pandemia, el a saca loke segun Biblioteca Nacional, ta su prome thriller na Papiamento.
El a bisa cu mayoria di su bukinan ta skirbi na Ingles, y a base di esey el a publica tur su otro storianan cu ta na Ingles mas den genero di Ciencia Ficcion. El a subraya cu e tin un meta semper den tur loke e ta skirbi: mester tin algo di Aruba aden; sea e protagonista ta Arubiano, of e ta un Arubiano cu ta studiando afo, of ta traha den exterior, vooral esnan skirbi na Ingles. E bundle titula “Outpost Alto Vista” el a zorg pa tin elementonan Arubiano acerca.
E ta corda cu el a sigui un curso, pasobra e mes no ta hopi den poesia, y Gina cu ta PR di Biblioteca a puntre pakico e mes no ta duna un curso. El a contesta “pakico no?” Pasobra e tin hopi material di cual e por saca “inside” di dje.
“Mi a bisa OK. E ta un reto y ora cu mi a wak e grupo, e tabata di diferente edad y background. Mi a haci e curso mas ‘uitgebreide’ posible. Mi bedoeling ta cu hendenan ta paga placa, mi kier duna nan e maximo di mi mes. Y na final, cada siman cu mi bin les, e reto ta bira cada bez mas grandi”, el a bisa.
Esaki te na final, pasobra e mes a produci buki. E bukinan manera el a bisa prome, e mes a print nan via Merca, anto mi a duna nan e idea pa kico ta cu nan skirbi publica esaki. “Pasobra ora di publica e ta un experiencia inolvidable. No worry si e storia bon of si e ta cumpli cu locual boso a haya den les, pasobra den skirbimento no tin regla pasobra e ta algo di bo y bo por crece toch. Anto, asina aki e Buki ‘ Maraca: un sentimento Caribense’ expresa den historianan skirbi den poesianan cortico, a mira luz na December, aña pasa, y e ora ey ta djis warda ki dia nos ta haya un chens pa bin presente”, Vi Frank Jr., a expresa.
Finalmente el a menciona cu esaki a bay hopi bon, y pa su persona ta un honor di a duna e curso aki, cu mañan tin e chens di por sigui cu skirbimento.
{gallery}Buki Maraca a wordo presenta oficialmente, na Biblioteca Nacional{/gallery}
