Hospital a dedik'e simposio --- ORANJESTAD (AAN): Recientemente vakgroep di ginecologonan conhuntamente cu HOH a organisa un simposio specialmente dedica na ginecologo dr. Frank Ho-Kang-You.
E sala di Marriott Ballroom tabata completamente yen di coleganan den cuido medico cu tin afinidad den ginecologia pa asina hunto tuma despedida di e specialista aki. E simposio aki a carga nomber di dr. Ho-Kang-You y a trata diferente topico.
Dr. Frank Ho-Kang-You tin 35 aña den su funcion como ginecologo y a contribui grandemente na cuido medico en general y na comunidad di Aruba. Ela atende mas di 10.000 parto cu ta inclui cesarea tambe y tambe el a yuda na “upgrade” e cambernan di parto na Hospital. Diagnostico prenatal y consulta cu cardiologo di mucha tambe tabata parti di su trabou medico. Ela yuda studiantenan pa siña traha cu aparato di echo y educanan pa loke ta partonan y e retonan den esaki. No por keda sin menciona su contribucion na traha un buki di parto electronico. Sigur un specialista cu hopi amor y dedicacion na su trabou y sigur hopi proefesionalnan den cuido medico pero tambe pashent lo haya falta di dje.
“Ta un honor pa mira asina hopi cara conoci cu tabata kier atende e simposio aki pa intercambia informacion y conocemento di nos profesionalnan den ramo di salud. E simposio tabata planea pa tuma luga prome pero door di e pandemia mester a pospone esaki,” asina dr. dr. Ho-Kang-You a conta.
A habri e simposio aki sr. Jacco Vroegop, director di HOH cu a hiba algun palabra bunita dedica na dr. Ho-Kang-You incluyendo algun anecdota di e ginecologo. Hospital y tur colega ta sumamente orguyoso di tur e logronan di dr. Ho-Kang-You cu semper a traha na bienestar di pashent. Claro tambe sr. Vroegop a gradici dr. Ho-Kang-You pa sigui den cuido medico pero awo dunando conseho formando parti di Hunta di Supervision di HOH. Un trayecto di 35 aña cu sigur ta bay den Aruba su Historia pa loke ta cuido medico.
Dr. Daphne Moreta, ginecologo, a papia tocante e topico di echo. Ela conta e storia di echo na Aruba y e nivel di testnan cu nos ta aplica aki na Aruba. MI ta hopi contento cu dr. Moreta ta sigui e trabou cu mi persona a haci den e ultimo 35 añanan.
Tambe professor dr. Curt Burger, ginecologo a papia tocante siguridad den un hospital,” Dr. asina dr. Ho-Kang-You a menciona. Dr. Shirley Lo-A-Njoe a splica tocante cardiologia di mucha na Aruba. Moderador y alabes ginecologo cu a entretene tur presente tabata dr. Marieke Houwert- de Jong. A sera e anochi cu un bunita dedicacion na e tremendo ginecologo di Aruba y e mes a hiba palabra tambe gradiciendo tur hende cu a haci su carera professional posibel.
Un iniciativa cu sigur ta di admira pa e grupo organisatorio di un simposio asina special dedica na un profesional cu a dedica su bida na su pashentnan. Danki di curason dr. Ho-Kang-You!
https://diario.aw/categories/noticia/general/despedida-despues-di-35-ana-como-specialista-na-ginecologo-dr-ho-kang-you#sigProIdb5f7f1f0a0
