Indice di Prijs di Consumo pa Aruba
ORANJESTAD (AAN); Ainda por corda e conferencia di prensa grandi teni na December 2019, ora cu Gobierno hunto cu Utilities Aruba NV cu NV Elmar y WEB Aruba NV a anuncia cu pa henter 2020 e prijs di tarifa di awa y coriente lo keda mescos.
A sali na cla, cu esey a sigui di ta e caso pa henter 2021 tambe.
E recien relato di Oficina Central di Estadistica tambe ta mustrando esey, esta cu e prijs di coriente keto bay a keda mescos.
Si acaso abo a haya mas cobranza, esey nifica cu bo consumo (gasto di aparatonan) a traha extra e luna ey y cu bo recibo a bin mas hopi.
Segun Oficina di CBS, e prijs di utilidad (electricidad y awa), gasolin y diesel ta worde determina primordialmente door di e prijs internacional di petroleo. Na November 2021 e prijs promedio pa bari di petroleo (US$ 80.13) a conoce un caida di US$ 0.36 (-0.4%) compara cu October 2021 (US$ 80.49).
Prijs di electricidad y di awa no a cambia compara cu October 2021. Consecuentemente, e prijs promedio di electricidad pa vivienda a keda Afl. 240.09, mientras cu e prijs promedio di awa pa vivienda a keda Afl. 137.05.
Prijs di gasolin a registra un subida di Afl. 12.20 cent (5.2%) na November 2021 y a causa un efecto di 0.25 ppt riba e CPI. Prijs di diesel a registra un subida di Afl. 15.80 cent (8.2%) na November 2021 y a causa un efecto di 0.03 ppt riba e CPI.
November 2021, utilidad, gasolin y diesel como grupo, tabata tin un subida di prijs di 1.7% compara cu October 2021 y hunto tabata tin un influencia di 0.28 ppt riba e CPI, mientras cu e restante 404 bienes y servicio hunto, a conoce un subida di prijs di 0.4% y tabata tin efecto un efecto di 0.32 ppt riba e CPI.
