Desaroyo di Hotel Secrets Baby Beach ta bayendo biento en popa

Errol de Freitas, presidente di SNBA:

ORANJESTAD (AAN) Den entrevista cu e presidente di San Nicolas Business Association (SNBA), señor Errol de Freitas, el a duna un interesante actualizacion, tocante e desaroyonan cu ta tumando lugar na San Nicolas:

   Biento en popa: Na prome lugar de Freitas a indica cu e desaroyo di Hotel Secrets Baby Beach, ta bayendo “biento en popa”, y actualmente nan ta den un fase unda cu nan ta buscando vivienda pa e hendenan specializa cu ta trahando den e proyecto, sea apartamento of casnan, preferiblemente pariba di brug.

   Job Fair: De Freitas a duna di conoce, cu ta bon pa pueblo sa cu SNBA tambe ta organizando un Job Fair, pasobra nan si ta kere cu tin Arubiano cu por traha y cu por haya trabao.

“Dentro di poco ora e summer aki pasa, nos ta bay ta cla pa anuncia e fecha cu nos ta bay haci esey”, de Freitas a menciona.

   Yamada pa inversion local: Asociacion SNBA ta contento cu tin otro proyectonan cu ta biniendo afo, y ta SNBA su deseo pa inversionistan  Arubiano sali pa haci inversion.

“Actualmente, esey no ta pasando, pero recientemente, el a haya contacto cu varios inversionista di Aruba, cu nan mes kier inverti den e area di San Nicolas, y nos ta hopi contento cu esey”, Errol de Freitas a expresa.

El a informa cu Nanki lo cuminza aki algun luna, y e ta hopi contento cu tur cos a bay bon cu e promotornan, Secrets ta moviendo.

  Santana di Cacho: Señor de Freitas a señala cu actualmente, e preocupacion ta Santana di Cacho unda nada pa coregi e  problema ta tumando lugar.

“Nos tabata tin entrevista, nos a tuma contacto y tabata tin un reunion, pero mi no ta sinti cu e reunion a duna nada. Nos a manda un carta na DVG y nan ta haciendo nos un monton di pregunta, y mi a bisa un di e miembronan di e management team eynan, cu tur e preguntanan ey nan por haci nan ora nos sinta, pasobra nos kier papia di e tema”, De Freitas a subraya.

El a agrega cu esey ta algo desagradable ora di mira e cadavernan asina, y mester busca un manera pasobra ora di cana eynan, e lugar ta un mix, y tin cu drech’e.

   Avenida pa Colony: “Otro tema interesante ta e avenida cu ta bin pa Colony, e caminda pa yega e cayanan di San Nicolas, manera nos semper a para bisa, cu e parti comercial, negoshi, tin cu sosode den nos cayanan, y Gobierno a duna esey un bon oido. Unico diferencia cu nos ta trahando riba dje ta food court, na Baby Beach, caminda bo ta bay haya diferente negoshi di snack cu ta funciona na un ora specifica. Pero e avenida, actualmente, nos ta den combersacion pasobra diferente departamento y nos, tin diferente area cu nos ta mire miho, caminda mester ta”, Errol de Freitas, presidente di SNBA a conclui.