ORANJESTAD (AAN)—Lothar Irausquin, funcionario di Departamento Meteorologico Aruba, a amplia e informacion den e conferencia di prensa,
tocante e simulacro yama “tsunami exercise”, cu ta bay tuma lugar diahuebs 20 di Maart, pa keda bon informa, con pa prepara nan mes pa enfrenta un tsunami.
E ehercicio yama “Caribbean Wave 25” ta conta cu participacion tambe di KPA, Brandweer, y e obhetivo ta pa wak si tur stakeholders ta haya nan mensahe. “Nos tin dos buki cu por download via caribbeanwave.org. Un di e bukinan ta: “General Tips Guide” pa un tsunami, kico pa haci, e otro ta un manual cu ta specifico pa e aña, pa e Caribbean Wave Exercise. Tur dos ta obtenibel na caribbeanwave.org.
El a duna di conoce cu tin dos scenario pa e dia di e simulacro: “Jamaica Scenario” y “Portugal Scenario” y Aruba a opta pa “Jamaica Scenario” y tur ta sosode na 15 utc, cu kiermen 11’or ora local. Di Jamaica tin un magnitud di 8.0 y esun di Portugal tin un magnitud di 8.6.
“Nos a dicidi hunto cu CMO pa opta pa Jamaica Scenario pasobra esey ta mas cerca y mas interesante pa Aruba”, Lothar Yrausquin a splica.
“Cu Jamaica Scenario bo por wak unda e strea ta, unda e teremoto ta, anto den color bo ta wak tur e costanan di e islanan y America Central y Sudamerica, y e haltura di e olanan ora nan ta yega e costa di e islanan. Pa Aruba e haltura ta entre 0.3 te 1 meter di ola, y esey ta suficiente halto pa evacua henter e costa”, Lothan Irausquin a señala.
El a agrega cu e “Pacific Tsunami Warning Center” ta manda e prome mensahe ora e sosode, y despues ta bin e siguiente e-mails. Meteo Aruba ta haya e mails y ta manda e informacion pa tur stakeholders pa prepara nan mes. Irausquin a menciona cu e Jamaica Scenario ta di un tsunami original.
E ta recomenda pa participa den e ehercicio (simulacro) aki, y esun interesa registra na Tsunami Zone Registration, y informa cuanto hende ta bay participa. El a agrega cu mester tene cautela pasobra si hende ta bay spanta y kere cu ta algo real, mester tuma procedure pa alarma falso, y splica tur hende cu ta un ehercicio.
