Mevery Romano di DIMP:
- Esnan coriendo cu nummerplaat bieu ta paso nan no a paga
ORANJESTAD (AAN)-- Señora Meverly Romano, Relacionista Publico di Departamento di Impuesto (DIMP), a duna di conoce den entrevista cu DIARIO, cu nan a logra parti tur e plachinan di number, cu e personanan tabata tin paga.
Dia 8 di September DIMP a tene un conferencia di prensa, den cual a anuncia cu Cuerpo Policial lo a cuminza haci control entrante 1 di October, 2025, y asina a tuma lugar tambe.
“E momento ey nos a cuminza hala mas dilanti tur e personanan cu tabata tin cita na November, na December y hasta Januari, pa nos por a yuda nan na tempo, prome cu 1 di October.
“Nos a logra esey, pero bo ta haya cu tin personanan cu toch nan mes a bira hala nan cita bek pa despues di October, y kizas nan tin motibo p’esey; kizas nan no ta na Aruba, of nan seguro no ta na orden.
“Esey a pasa, pero despues di October nos a keda yuda nos clientenan den November hasta den December, y aworaki nos ta yega Januari, y si wak e cantidad di citanan cu nos tin pa dia, ta mas of menos 3, 5, 10 cita pa dia, pues e cantidad t’asina menos compara cu aña pasa”, Meverly Romano a relata.
El a agrega cu esnan cu ta core cu plachi cora cu blanco of hasta oranje riba caminda, ta e grupo cu no a haci nan pago di belasting, of nan a paga pero nan no tin e seguro na ordo, y p’esey nan no por haya nan plachinan, pasobra si e seguro no ta na ordo e persona no por haya su plachi.
