Departamento di Cultura y Fundacion Lanta Papiamento a celebra Dia di Diversidad Multicultural

Cu acogida grandi di residentenan procedente di otro paisnan

ORANJESTAD (AAN):  Diasabra anochi tabata tin un celebracion na Cas di Cultura den cuadro di Dia Internacional di Diversidad Multicultural pa Dialogo y Desaroyo. E evento tabata tin e nomber di e di 2 Encuentro Multicultural Aruba 2022 unda a conta cu participacion di e comunidadnan di diferente pais cu ta residente na e isla.

Stanley Dabian, Relacionista Publico di Departamento di Cultura a duna di conoce cu esaki ya caba ta un evento cu DCA ta haci y e tabata bao di un feria multicultural unda tabata tin cuminda, artesania y presentacionnan cultural.

Pero pa motibo di e pandemia, aña pasa, a bin cu e formato aki di encuentro nacional multicultural, a bisa.

Na 2021, el a wordo haci di un manera virtual, sin publico. Pero e aña aki DCA ta contento cu ta bolbiendo bek na e normal nobo c'un sala completamente yen cu participacion di mas o menos 17 pais cu ta organisa aki na Aruba y cu tambe a organisa nan presentacion pa medio di nan consulado.

Dabian a agrega cu e ana aki, Fundacion Lanta Papiamento tambe a uni cu DCA pa cu e evento aki. "Net awe, 21 di Mei, cu ta dia di diversidad cultural, pero tambe ta dia di oficialisacion di idioma Papiamento na Aruba".

DCA tabata hopi contento cu e evento ya cu e entusiasmo tabata halto. A inicia atardi cu un desfile chikito, cu bandera di diferente pais cual a wordo poni riba Plaza Betico Croes y eynan a sali na pia den direccion di Cas di Cultura.

Despues e anochi a continua cu presentacionnan musical di Scol di Musica Rufo Wever cu nan grupo Caribbean Combo bao di direccion di maestro Carlos Bislip. Asina e anochi a sigui cu otro presentacion y cu discurso di Minister Maduro, como tambe di director di Fundacion Lanta Papiamento Edward Pietersz.

Algun di e paisnan cu a realiza nan presentacion tabata Aruba, Argentina, Bonaire, Brazil, Colombia, India, Republica Dominicana, Venezuela, Spaña, Mexico, Portugal, Peru y Surinam.