Departamento di Cultura Aruba ta organisa gran celebracion nacional di 20 aña Encuentro Multicultural

Y prome lustro di Dia Mundial di Diversidad Cultural pa Dialogo y Desaroyo

ORANJESTAD (AAN): Departamento di Cultura Aruba (DCA) ta invita comunidad arubano pa participa den e gran celebracion nacional cu lo tuma lugar Diasabra, 17 di mei 2025, na Plaza Libertador Betico Croes. E evento ta den marco di 20 aña di Encuentro Multicultural Aruba y tambe pa conmemora e prome lustro di celebracion di Dia Mundial di Diversidad Cultural pa Dialogo y Desaroyo.      

            Pa e ocasion especial aki, DCA a prepara un programa vibrante cu ta inclui un Feria Gastronomico y un Show Multicultural, cu lo cuminza di 5:30 di atardi te cu 11:00 di anochi. Tur hende ta invita pa bin goza di un anochi di union, cultura, sabor y ritmo, den un ambiente familiar y alegre.  

            E feria lo presenta diferente pais cu nan cumindanan tipico, y e show lo ta plataforma pa gruponan cultural local pa presenta nan talento den danza, musica y presentacion artistico.

            Departamento di Cultura Aruba ta invita tur hende pa bin celebra e rikeza di nos diversidad cultural y pa fortalece e dialogo entre comunidadnan na Aruba.

Potretnan: Facebook Page DCA