Departamento di Asuntonan Economico/IDEA a organiza workshop “Business License”    

ORANJESTAD (AAN): Departamento di Asuntonan Economico, Comercio y Industria

mediante su unidad di Iniciativa pa Desaroyo pa Empresa Arubano (IDEA) y cu colaboracion di su unidad Establecimento di Negoshi a organisa un workshop: “Business License” riba 18 november 2022. 

E oradora, Sra. Mary Baarh, hefe di e unit di Establecimento di Negoshi (Vestigings van Bedrijven) na Departamento di Asuntonan Economico, a presenta lo siguiente:

• Definicion di negoshi
• Den ki forma legal por opera un negoshi
• Kico tur ta prohibi bou di Articulo 2 di e Ley di Establecimento di Negoshi si no tin e permiso necesario
• Ken tur mester di un permiso pa negoshi
• Pa cua compania y institucion e ley aki no ta aplicabel
• Banda di e ley, kico e Guia di Maneho nobo ta encera
• Tres categoria cu ta cay bou persona natural
• Ken tur por cay bou di persona categoria LOCAL
• Ki ora un por nenga un permiso?
• Gastonan di un permiso pa negoshi
• Ki tur mester considera ora di scoge un nomber comercial
• E servicio cu seccion di Establecimento di Negoshi ta ofrece
• Demostracion di nos website deaci.aw pa haci peticion pa permiso den forma digital
• Con pa monetaria e proceso di bo peticion online via Join Information Portal
• Ki tur mester tene na cuenta cune prome cu cuminsa un negoshi 

Durante y despues di e presentacion e oradora a contesta tur e preguntanan cu bin di parti di e participantenan. E contestanan ricibi tabata satisfactorio y comprendibel. 

E workshop aki a tuma luga na Departamento di Asuntonan Economico y a haya un participacion di en total 38 persona. IDEA ta sumamente contento cu e contenido di e workshop y tambe di e bon comentarionan ricibi di su participantenan na final di e workshop. E contenido tawata sigur hopi informativo y interesante. 

IDEA su eventonan sa ta gratis y ta dedica na SMEs (Small & Medium Enterprises) y tur cu ta desea di cuminsa un negoshi y cu kier educa nan mes riba diferente topiconan comercial. 

 Un danki na tur e participantenan y un danki special na e presentadora di Departamento di Asuntonan Economico cu a comparti su experticio cu tur esnan cu a tabata presente durante e workshop aki. 

Mirando e interes grandi den e topico aki, nos lo bay ripiti e workshop aki un biaha mas den comienso di aña 2023.