Sino ta Covid por ta Dengue? - *Elimina criaderonan di sangura
ORANJESTAD (AAN): Manera ta conoci awaceronan a cay recientemente y esaki por ta motibo pa e criaderonan di e sangura cu ta transmiti Dengue por cuminsa trece cu ne cu a sanguranan aki ta broei.
Si bo sa cu den bo cura tin posibilidad pa haya criaderonan di sangura ta miho pa cuminsa elimina nan pa evita cu bo ta bira malo.
DARIO tin informacion di casonan na otro paisnan den e region cu a bira basta malo y te hasta a kere cu nan tabata tin Covid-19, a pesar di ta vacuna, ya cu e sintomanan cu nan a presenta tabata similar na Covid-19.
Despues di a haci e testnan necesario pa descarta cu por a trata di Covid-19 locual e mediconan a bin constata ta cu tabata trata di Dengue. Ya cu por ta Chikungunya, Zika, Leptospirosis, entre otro.
Tin otro personanan cu tambe a bira malo na mesun momento, na e mesun cas, y a resulta cu no tabata ni Covid ni Dengue locual a conduci cu mester a realisa mas testnan pa haya sa precis kico ta causando e sintomanan similar na e dos malesanan menciona.
Segun CDC di Merca, e virus cu ta causa dengue y e virus cu ta causa COVID-19 por provoca sintomanan similar den e prome etapanan.
DENGUE:
Dengue ta wordo causa pa un di e cualkier di e cuater virusnan relaciona: virus di dengue 1, 2, 3 y 4. Pa e motibo aki, un persona por wordo contagia cu e virus di dengue varios biaha durante su bida.
Con e ta wordo transmiti?
E virusnan di dengue ta wordo transmiti na e personanan pa medio di e picadura di sanguranan infecta, principalmente e sanguranan Aedes aegypti.
Sintomanan:
E sintoma mas comun di dengue ta fiebre acompaña pa cualkier di e siguientenan:
- molester y dolornan (na e wowonan, generalmente patras di e wowonan, dolor muscular, di jointnan of dolor di wesonan)
- Nausea, sacamento.
- rash
E sintomanan di dengue generalmente ta dura entre 2 pa 7 dia.
COVID-19
E malesa di Coronavirus 19 of Covid-19 ta un malesa respiratorio causa pa un coronavirus cu yama SARS-CoV-2.
Con e ta wordo transmiti?
E virus cu ta causa Covid-19 ta wordo propaga principalmente pa medio di particulanan chikito cu ta sali for di e boca ora cu un persona infecta ta tosa, nister of papia.
Sintomanan:
E personanan cu Covid-19 por presenta un variedad di sintomanan cu ta inclui:
- Fiebre of calafrio
- Tos
- Dificultad pa hala rosea
- Fatiga
- Dolor di curpa of den e musculonan
- Dolor di cabez
- Dolor di garganta
- Perdida reciente di smaak of di olfato
- Congestion nasal of verkoud
- Nausea of sacamento
- Diarea
Cuanto tempo un persona por ta malo cu Covid-19 y mustra sintomanan por varia.
Den tur dos caso ta recomendabel pa of pa test of pa acudi na e docter di cas.
Tin señalnan di advertencia den caso di dengue cu generalmente ta cuminsa entre 24 y 48 ora despues.
Si bota presenta algun di e siguiente sintomanan, ta mihor pa busca atencion medico di inmediato:
- Dolor of sensibilidad na e stoma
- Sacamento (alomenos 3 biaha den 24 ora)
- Sangramento via e nanishi
- Sangramento den e saca of af
- Sensacion di cansancio, inkietud of iritabilidad
Den caso di Covid-19, segun CDC, esaki ta e señalnan di advertencia:
- Dificultad pa hala rosea
- Dolor of presion persistente na e pecho
- Confusion reciente
- Incapacidad pa lanta of permanece spierto
- Lipnan of cara blauw
E temporada di awacero lo sigui den e proximo simannan ya cu October ta conoci como un luna di hopi yobida. Tene cuenta cu e informacion menciona y evita e criaderonan cu por ta ubica unda bo menos ta spera. Un baki bandona den patio, un tire, cualkier articulo unda awa por keda para y bira e lugar adecua pa e sangura pone su webonan.
