ORANJESTAD (AAN): SKOA ta informa mayornan cu den e ultimo siman di scol entre 8 cu 12 di juli, por haci peticion pa cambia nan yiu(nan) di scol.
Loke bo tin cu haci pa cambia di scol: Pa cambia oficialmente di scol mester haci esaki oficial via e cabesante di scol. E peticion di cambio di scol lo worde procesa digitalmente via e systema central di SAS. Pa haci e peticion oficial di cambio di scol mayornan mester acerca e cabesante di scol entre 8 - 12 di Juli 2024. Tur peticion lo worde procesa segun e secuencia di entrega, pues mas trempan haci e peticion mas trempan esaki lo worde procesa. Importante pa tene na cuenta cu peticion pa cambio di scol no por worde haci durante vacacion di scol.
Documentonan necesario pa cambio di scol: Tin di bin cu (*) Uittreksel bevolkingsregister (papel di Censo), (*) Copia di Zorgpas AZV, (*) Prueba di pago di aña escolar (schoolgeld).
Despues cu a cumpli cu e rekesitonan mayornan lo ricibi un respuesta pa cu e peticion di cambio di scol despues di 10 dia di trabao. Despues di esaki lo ricibi un carta di ubicacion y por continua na inscribi e yiu(nan) na e scol nobo.
Otro Schoolbestuur: Mayornan cu tin yiu(nan) inscribi na scolnan cu ta resorta bou di otro schoolbestuur por haci inscripcion pa un scol di SKOA via e website www.skoa.aw bay na seccion di 'Inschrijving'.
SKOA ta e organizacion di educacion mas grandi na Aruba cu ta ofrece educacion di calidad halto. Nan tin un curiculo completo cu ta enfoca ariba e desaroyo y crecemento general di cada alumno y studiante. SKOA ta enfatisa su balornan Catolico, comunicacion na nivel multilingual, inclusion, innovacion y tambe actividadnan extra-curicular. Como mayor bo por ta sigura cu bo yiu(nan) lo ricibi un educacion completo na SKOA. Si bo kier pa bo yiu experiencia un forma diferente pa siña y descubri su potencial aplica na SKOA.
