Parlamentario Alvin Molina:
ORANJESTAD (AAN): Un topico basta actual den comunidad di Aruba ta e construccion di hotel.
Parlamentario Alvin Molina, di Fraccion di MEP a expresa cu Gobierno di Aruba tin cu percura pa economia por crece y desaroya pa asina crea mas cupo di trabou y pa famianan por tin un entrada. Di otro banda, nos tin cu cuida nos medio ambiente, naturalesa y patrimonio. Tambe, mester percura cu nos hendenan por yega na un pida tereno pa traha nan cas of desaroya un actividad comercial.
Ta notabel cu e hotelnan na Aruba ta birando hopi. Tin areanan, por ehempel Palm Beach caminda hotelnan ta sali manera 'paddenstoel', mayoria hende no sa mes cua hotel e ta of con yam’e.
E por bira un reto pa haya hendenan local, profesional y cu ta disponibel pa yena tur e cuponan di trabou. Consecuentemente, lo mester busca hendenan di afo, aunke esey no ta nada malo, di otro banda, ta bay tin presion riba, entre otro, nos infrastructura, vivienda, riba e sistema di cuido medico y enseñansa.
Pa loke ta e parti pariba di brug, San Nicolas, pa decadanan a keda atras y a bira un ‘ghost town’. Prome cu refineria a cera San Nicolas tabata e ‘main area’. San Nicolas mester bay bek na unda e tabata. Pa por logra esaki, mester tin desaroyo. Mester tin movecion di hende pa asina comercio por crece cu consecuencia cu economia lo crece, mescos cu infrastructura lo mehora y tambe siguridad, Parlamentario Molina a enfatisa. Mester busca e manera con pa desaroya San Nicolas. Varios idea y plan a bin ariba mesa. Un idea ta pa conecta Promenade cu e parti pariba di mainstreet San Nicolas, pa di e manera aki e area tambe por beneficia di e exito.
Pa loke ta trata Secrets Hotel, Parlamentario Molina a indica cu e concepto no ta ideal pa San Nicolas, ya cu e ta un hotel ‘all inclusive’. E unico manera cu e hotel por ta beneficioso pa e area, ta si nan por ofrece cierto servicio na e cliente y encurasha nan huesped pa sali explora y gasta cen na loke San Nicolas tin pa ofrece. “Un hotel ‘all-inclusive’ no ta ideal pa e area, pero ami ta kere cu nos por logra e ‘spin-of’ ainda. A papia caba cu e desaroyadonan di e hotel y nan ta dispuesto pa yuda promove locual e area tin pa ofrece, pero tin cu zorg pa e area tin algo di ofrece", el a enfatisa.
“Locual e hotel aki por trece pa e hendenan local sigur ta cupo di trabou den e area y kisas esnan ta trahando den e cadena hotelero te na e otro banda di Aruba, por scoge pa traha mas cerca di cas locual lo scapa nan hopi cen na transporte y ora pa dia cu nan lo por inverti bek den nan famia y nan salud”, el a señala.
Den tur proyecto semper tin aspectonan cu mester tene cuenta cu nan, pa nan no bira di mas y perhudica, entre otro, nos naturalesa, medio ambiente, cultura y patrimonio. Mester percura pa esey wordo minimalisa mientras cu ta percura pa e beneficionan ta mas grandi posibel pa Pueblo di Aruba.
P’esey hustamente Parlamento di Aruba a aproba e ley pa minimalisa mas hotel na Aruba. Gobierno di Aruba ta haciendo loke ta posibel pa 'reverse' e acuerdonan haci durante gobernacion anterior, cual ta encera e miles di camber di hotel cu a keda firma. Den e caso di Secrets Hotel, hopi hende ta kere cu e beneficionan ta grandi y e preocupacionnan ta real, pero tin manera pa mitiga esey, Parlamentario Molina a finalisa bisando.
{gallery}Den tur proyecto tin aspectonan cu mester tene cuenta pa nan no bira di mas y perhudica naturalesa, cultura of patrimonio di Aruba{/gallery}
