Parlamentario Jennifer Arends-Reyes:
ORANJESTAD (AAN) – Parlamentario señora Jennifer Arends-Reyes, di fraccion di AVP, y di e Comision di Labor di Parlamento, a señala den entrevista cu DIARIO, cu su fraccion tabata tin diferente reunion caba cu stakeholders, y cu e parti cu semper a bin dilanti ta e scarcedad di trahado y tambe e falta di continuidad.
Esaki debi cu hopi biaha nan ta cuminza traha pero si nan no ta motiva, of e trabao ta duro, nan no ta sigui y tur esakinan ta puntonan cu mester percura pa beck riba enseñanza, e parti di pasantia/stage, laga nan conoce di cerca e trabao, prome cu scoge pa bay den ramo di HORECA, por ehemplo, den e parti di servicio y di turismo, cu ta trabaonan duro.
“Akinan, nos ta papia di calidad. Kiermen, nos bishitantenan cu ta bin Aruba, nos mester percura pa nan haya cierto standard di servicio. Bo mester tin motivacion, training, incentivo, tambe pa bo yega unda bo mester yega.
Mi ta kere cu di parti di tur e stakeholders, si ta restaurant, hotelnan, hopi biaha mester inverti den e parti di capacitacion tambe di e trahadornan, y e incentivonan pa nan”, Parlamentario Arends-Reyes a remarca.
Un caracteristica di un mercado liber, manera Aruba, ta di mantene loke bo ta inverti den dje, y esaki ta parti di e departamentonan di Recurso Humano, pa tene diferente dialogo cu e trahadornan tambe, puntra kico ta loke ta motiva nan, di con nan lo por kita of di con nan lo no kita, y esaki ta extra esfuerzonan colectivo, pa wak di cerca kico ta e interes di e trahadornan hoben, pero tambe den e forza laboral kico ta motiva nan, sea pa keda of sea pa cambia.
“Esaki ta un tema nacional hopi grandi cu nos tin cu takel, como pais nos tin cu atende pa locual ta e parti di demanda grandi cu tin den e sector aki. No ta nada pa tuma ‘light’, y na e momentonan aki nos tin tambe e aspecto di reto di aeropuerto, cu tin su limitacion. Nos por tuma e tempo ey tambe, y e parti geopolitico tambe ta hunga un rol, pa nos tuma e tempo pa enfoca enberdad riba kico nos tin riba forza laboral, kico nos mester”, Parlamentario Jennifer Arends-Reyes a señala.
