ORANJESTAD (AAN): Recientemente den un entrevista cu DIARIO director di Centro Kibrahacha Jeffrey Matos a papia riba e tema di inclusion social y a indica cu e ta un topico hopi importante.
“Nos bay elabora riba dje y papia riba dje y e ta rekeri si cu mester traha hunto cu otro instancianan”.
Bo por a wak un cooperacion cu IBiSA cu ta haci un impacto hopi importante pa nos organizacion Club Kibrahacha, pero alaves riba otro areanan bo mester traha hunto, segun Matos.
El a sigui bisa cu e ta kere cu e impacto negativo cu tin ora e sociedad ta crece y bo ta haya un grupo grandi di adulto mayor cu no ta participa activamente mas, e resultado ta exclusion y soledad.
Segun e director di Kibrahacha, soledad ta trece su retonan cune, incluyendo por ehempel retonan di salud.
“Nos mester bira esaki y como Kibrahacha nos ta mira e necesidad grandi aworaki y nos tin un plan strategico nobo riba e parti di inclusion social”.
Den esaki participacion di e adulto mayor ta importante y actualmente como organizacion nos a crece grandemente cu e cantidad di participante y nos ta sigui crece diariamente.
Bo ta wak cu e rol di Kibrahacha e ora ey no ta solamente un rol di ta un centro di actividad, pero bo mester tin un opvang tambe, caminda cu bo tin trahadornan social cu ta dedica na e parti di adulto mayor y nan lo por identifica kico ta e necesidadnan personal di cada persona cu presenta akinan, segun Matos.
El a splica cu pesey Centro Kibrahacha ta den un proceso di cambio y ampliacion di e servicionan.
E intencion ta pa sigui enfoca riba e parti di inclusion social di e adultonan mayor.
El a splica cu e linea di telefon specialmente pa adultonan mayor a cumpli 2 aña y cu for di e yamadanan ta saca hopi informacion relevante pa por sigui amplia e servicionan di Kibrahacha.
