ORANJESTAD (AAN) – E miembronan di prensa Arien Rasmijn, Tito Lacle y Sharina Henriquez, tabata tin un encuentro cu Formador Evelyn Wever-Croes, den cuadro di e reunionnan cu stakeholders cu ta tumando lugar en conexion cu formacion di e gobierno nobo.
Rasmijn a menciona cu nan a papia riba varios tema pa loke ta trata maneho di prensa y su relacion cu gobierno, y con esaki lo por mehora un tiki mas.
“Nos a toca por ehemplo e tema di transparencia y cu esaki por mehora di gobierno pa nos, kico por wordo haci. Nos a discuti tambe con cierto cosnan a bay durante e ultimo aña, den un situacion extraordinario di pandemia, entre otro topiconan”, Rasmijn a bisa.
El a acentua cu tabata tin un bon intercambio entre Formador y otro miembronan cu tabata tey. “Loke a resalta, ta cu pa nan ta e prome biaha, eigenlijk, cu nan por tin un combersacion habri cu un representacion di prensa. Prensa no ta formalmente uni den un gremio of un asociacion y mi ta sinti cu pa gobierno e tabata un ‘eye opening’. Nan a haci nos pregunta, y nos a intercambia bon cu otro”, Arien Rasmijn a señala.
Den e tema di transparencia, entre otro, a elabora riba LOB, unda Arien Rasmijn ta splica cu nan a trece dilanti Formador, cu no mester ta asina cu miembronan di prensa mester haci uso di e “Landsverordening openbaar van Bestuur” cada biaha, pero mester tin un miho comunicacion cu e gobernantenan unda nan tambe ta mira e importancia di duna prensa e informacion y documentonan cu nan ta pidi pe.
Tambe a bin dilanti e tema di Acreditacion, riba su mes. Rasmijn a splica cu por ehemplo, ora ta yega na un consenso den e combersacion unda ora cu un crisis tuma lugar, envez di gobierno keda enfoca riba maneho so, pensa na inclui prensa mas lihe posible den esaki, unda cu prensa mester ta un di e promenan yama pa sinta cu gobierno y discuti cu nan ta bay comunica cu otro, pasobra na final di dia, den un crisis, sea cu un medio ta liga na gobierno of no, tur hende ta beneficia di un bon comunicacion di parti di gobierno via prensa, pa pueblo. “Eigenlijk eynan e discusion a bay y nos tabata di acuerdo cu otro, cu prensa mester ta un di e promenan yama pa por tin e discusion na comienzo di e crisis” Arien Rasmijn a señala.
El a agrega cu esaki ta un comienzo, pasobra lo bay tin mas momentonan di discusion entre gobierno y prensa, y eynan prensa mester bay busca den su mes ken ta bay represente y na un manera mas amplio posible, unda cu tur medio ta, y sinti su mes representa. “Pero Gobierno ta habri pa sinta cu nos periodicamente, y eynan tin un ganashi”, Arien a expresa.
