Den e ultimo dos siman - ORANJESTAD (AAN): Ronella Croes, CEO di Oficina di Turismo a duna di conoce cu ainda pa luna di Juli, ainda ATA ta sigui cu su proyeccion y ta spera cu lo surpasa 100 mil bishitante, desde cu a habri e frontera na Juli di aña pasa.
Ta mantene esey y e ta un indicacion cu ta sigui bay dilanti pa loke ta trata cantidad di bishitantenan, a bisa.
ATA conhuntamente cu otro autoridadnan ta sigui monitorea di cerca e impacto riba turismo di Aruba mara na e variante Delta.
Aworaki ta haciendo un sondeo un tiki mas extenso y e resultadonan di esaki lo mester a keda cla diabierna. Pero tin indicacion cu den e ultimo dos siman a bin ta mira algun cancelacion adicional di viahe pa Aruba of cu hendenan ta pospone nan viahe pa Aruba, a indica.
Ta mara esaki na e impacto di e variante Delta. Ya caba ta mira algun impacto y e escogencia di algun bishitante pa no continua cu nan viahe. Esaki por tin di haber cu e casonan den nan mesun pais, pero tambe pa locual ta mira na Aruba, Ronella Croes a splica.
Esaki ta algo cu ta sigui hopi di cerca, pero esaki ta un prome ilustracion di e impacto cu algo asina por tin riba e recuperacion turistico, a remarca.
Banda di esaki a bolbe lansa un encuesta cu a haci anteriormente pa wak cuanto di e bishitantenan cu a 'book' un viahe pa Aruba caba of ta planeando nan viahe pa Aruba, cuanto di nan ta completamente vacuna.
E ultimo informacion ta mustra cu mas o menos 80% di e bishitantenan ta bisa cu nan ta completamente vacuna, cual ta un grado basta halto.
Locual ta hayando awor como resultado ta den e mesun direccion ya cu mayoria di e bishitantenan ta indica cu nan ta completamente vacuna. Pero no obstante esaki sa cu e casonan bao di e no-residentenan na Aruba a bin ta subi, pero e ta un porcentahe abao ainda compara cu e casonan positivo di esnan residente, e ehecutivo di ATA a remarca.
Esaki ta algo cu ta wordo discuti conhuntamente cu e cluster medico, pero tambe e cluster encarga cu transporte aereo, entre otro y puerto den e ultimo simannan.
