ORANJESTAD (AAN) — Juffrouw Jocelyn Jacobs, director di Soer Juliette Scol (antes Emmaschool) y Juffrouw Doris Franken director di Scol Paso pa Futuro,
a bin hunto den e reunion cu Formador Evelyn Wever-Croes, den e contexto di e reunionnan pa formacion di e siguiente Gobierno.
Den conferencia di prensa, Juffrouw Jocelyn Jacobs a elabora tocante con e reunion cu Formador a bay.
Jacobs a expresa cu e reunion aki tabata hopi fructifero y pa su persona ta un honor pa e scol a haya e espacio aki, den cual a toca puntonan importante manera e desaroyo di scol, areanan logistico y di personal, alumno y pedagogia didactico di e scol.
Juffrouw Jacobs a bisa cu e interes tabata grandi, preguntanan tabata al caso, y e contenido cu e scolnan a trece dilanti sigur ta na bienestar general di enseñanza special y di nos muchanan den su totalidad, den nan proceso di nan desaroyo cu nan siñamento na scol.
Juffrouw Jacobs a agrega cu e punto di mas importante cu nan a logra presenta na Formador, ta e identidad di scolnan M.O.K den e sistema di enseñanza actual na Aruba, unda cu nan ta tene cuenta cu tur innovacion cu kier eherce den enseñanza special, y den ki forma ta recomendable pa haci esaki, teniendo na cuenta cu innovacionnan grandi manera enseñanza inclusivo y cu e facilidadnan cu Aruba ta ofrece, actualmente, pa esaki por tuma lugar.
Tocante e parti di fusiona e dos scolnan grandi di enseñanza special den un solo edificio (fusering) no a bay hopi profundo den dje cu Formador, pasobra riba e aspecto aki tin un parti cu ya a wordo trata. Mas tanto a papia tocante e desaroyo di siñamento di e muchanan ta den e area curicular y e area di personal cu ta necesario pa traha den e scolnan y a enfoca hopi riba e continuidad di enseñanza special.
