Den presupuesto 2022 cu parlamento a aproba tin e suma cu mester pa paga e 5% entrante Juli 2022

Premier Wever-Croes: --- *Decision lo wordo oficialisa diabierna den Rijksministerraad

ORANJESTAD (AAN):  Premier Evelyn Wever-Croes durante un conferencia di prensa dialuna mainta a duna di conoce gobierno a dicidi pa adelanta, inclui e 5%  di e salario cu lo wordo duna bek na e empleadonan publico den e presupuesto 2022 caba.

El a bisa cu den e presupuesto 2022 cu parlamento a aproba tin e suma cu mester pa paga e 5% aki entrante Juli 2022.

Door di e deliberacionnan aworaki ta asina leu cu diabierna ultimo Secretaria di Estado Alexandra van Huffelen a inform'e cu Ministerraad Hulandes a bay di acuerdo pa stop e recorte di salario y pa lag'e den man di e paisnan basta cu nan ta cumpli cu e condicionnan. E 20 ministernan cu tabata den Ministerraad siman pasa, e siman aki diabierna den Rijksministerrad lo bay trata esaki unda lo tey tambe e Ministernan Plenipotenciario di Aruba, Corsow y Sint Maarten.

E mandatario a referi na esaki pasobra a cuestiona si e decision a cay siman pasa of si e ta bay cay e siman aki. El a remarca cu e decision ta bay wordo oficialisa pa fin di e siman aki na Hulanda. 

Mientrastanto, Gobierno di Aruba a cuminsa haci e trabaonan caba pa percura cu tin suficiente likides (cash) pa ora cu cuminsa paga por sigui paga tambe y no ta bay cay bek den problemanan financiero pa cu esey.

Pesey ta cuminsa dia 1 di Juli pasobra tur proyeccion ta indica cu Aruba por carga esey sin cu mester bati na porta di Hulanda pa sosten di likides, cu ya caba a wordo indica cu Aruba no lo haya mas, Premier Wever-Croes a subraya.