Raymond Knops tabata prome cu e papia di “tik op de vinger”
*Den turbulencia politico na Den Haag no por kibra Statuut
*Rapport di CaFT a confirma cu Wever-Croes a trece cambio
ORANJESTAD(AAN)—Cu no ta awor Hulanda ta den problema serio, ta bini dilanti den e desaroyonan di for di prome cu tempo di Covid-19 cu tabata presenta nan mes na e pais mas grandi den Reino Hulandes.
Awe no ta problemanan di Aruba ta e asuntonan mas serio cu politiconan Hulandes mester confronta, pero asuntonan cu a wordo haci posibel pa Prome Ministro Mark Rutte y su diferente gobiernonan, pasobra nan no a wordo atende na tempo dor di Gabinetenan di Rutte mes.
E fayo di Aruba ta, cu na Aruba e gran mayoria di politiconan ta ataca otro, pero no ta sigui y no ta kibra nan cabez cu e problemanan grandi cu tin den mundo politico na Hulanda y awe a rementa den man di Mark Rutte cu a neglisha cantidad di asunto cu e mester a atende na Hulanda.
Gobierno Mark Rutte tabata tin gran popularidad pasobra e no a atende cantidad di asunto cu tabata sumamente importante, manera e migracion enorme pa Hulanda cu ta perhudica tur persona cu pasaporte Hulandes, incluso Arubianonan cu di acuerdo cu Statuut ta residencia na Hulanda.
E derecho cu Arubianonan tin na Hulanda ta regla den Statuut, cu ta papia di partnernan igual den Reino.
Ta derechonan di personanan naci na tur parti di Reino y ta ciudadano Hulandes, ta na wega dor di maneho cu a wordo hiba na Hulanda y cu ta haci imposibel na e momentonan aki, pa por ehempel estudiantenan cu ta bay Hulanda, por haya un lugar pa nan biba.
Migracion sin control ta uno di e problemanan mas serio na Hulanda y a habri caminda pa e panorama politico Hulandes, cu a bira sumamente dificil pa e Hulandes.
E derecho di e Hulandes mester a wordo persigui dor di gobernantenan Hulandes di tur partido Hulandes (di derechista pa izquierdista) cu a forma parti di Gobiernonan di Mark Rutte.
Awor problema ta rementa pasobra por ehempel medidanan cu mester tuma den cuadro di cambio di clima, ta mishi cu e cunukeronan Hulandes, e “boeren” cu ta mira terenonan cu pa generacionnan largo nan a sembra, na peligro.
Problema ta rementa awor den man di e politiconan Hulandes, awor cu piscadornan na Hulanda mester mira con ta subi laman cu nan barconan cu no ta permisibel mas pa cambio di clima.
E situacion cu a wordo crea na Hulanda mes, a haci cu e partido BoerBurgerBeweging, un partido di halto nivel nacionalista, por a yega na top politico di e pais y awor ta menasa tanto e partido di Alexandra van Huffelen como e partido VVD, den e eleccionnan dilanti porta cu segun tur pronostico BBB lo gana.
Kico lo pasa ora BBB gana eleccion?
Esaki ta bira e punto interesante pa Aruba, pa Europa y pa tur pais cu ta atende cu Hulanda, pasobra BBB ta un partido nacionalista cu a splica cu e cas Hulandes ta yen y no tin espacio pa mas hende.
Na e momentonan aki, mundo politico Hulandes ta un brote di confusion den cual e partidonan cu ta na mando mester scapa nan curpa.
Pa ta honesto, e votador Hulandes tin derecho di reclama cu e no por haya un cas pa biba aden y cu su bienestar no a wordo persigui manera mester ta.
E partido di Alexandra van Huffelen mester bay eleccion cu un lider nobo. Su lider ta uno di e hopi lidernan, cu a puntra nan mes pakico nan tin pia, y a bandona mundo politico Hulandes.
Aruba no por wordo uza den e panorama di confusion grandi na Hulanda mientras partidonan ta prepara nan mes pa entrega nan listanan di candidato cu cantidad di cara nobo na October pa asina fin di November Pueblo por vota pa un Parlamento y Gobierno Hulandes nobo.
For di momento cu Aruba a firma un acuerdo cu Hulanda, e wega di Raymond Knopps pa un “tik op de vinger”di Parlamento di Aruba, a wordo rechasa.
Pueblo di Aruba ta di acuerdo cu e abuso cu a tuma lugar cu placa di Aruba den pasado, no por continua.
Gobierno Evelyn Wever-Croes a tuma e medidanan cu mester a tuma y hasta CaFT a admiti na 2023 cu Gobierno di Aruba a percura pa un cambio positivo.
Un cambio cu merece respet pa Aruba cu hamas por wordo uza den e explosion politico Hulandes na caminda pa eleccionnan nobo na Hulanda, cu BoerBurgerBeweging a pusha den un nacionalismo comprendibel, pero cu no por mishi cu Statuut di Reino Hulandes.
