Den fin di siman e gran basebolista Gaby Illidge a fayece

Mr. Baseball di Aruba!

ORANJESTAD (AAN): Den fin di siman a drenta e informacion, cu e conocido deportista y gran personahe di mundo di Baseball na Aruba, esta Gabriel ‘Gaby’ Illidge a fayece.

   Ademas di tabata un comerciante exitoso na San Nicolas, el a sa di briya semper riba veld hungando e deporte cu mas el a stima.  Pero ora cu el a pone bate di baseball un banda, como ex-pelotero el a sigui duna guia na varios team y na e disciplina di deporte en particular.

   Di e forma ey, Gaby a bira conoci como un ehemplar Deportista y Dirigente di Baseball.  E tabata mentor di diferente persona conoci na Aruba tambe, cu a mire como e role-model pa asina sigui empuha mas prospecto pa sigui cu e training y mehora den Baseball.

   Gaby tabata conoci pa su team di Heineken, cu el a sa di guia y empuha na gana e titulo campeon na diferente ocasion.  Tambe el a lanta y dirigi e team patrocina pa Schlitz.  Tambe el a guia e team di Amstel cu a duna fabuloso prestacion riba veld.

   Gabriel Illidge a logra bira lider y dirigi e Organizacion di A.B.B.A., y fuera di esey a fungi den Comision Olympico di NaBaFe.

   Ta importante pa menciona, cu hopi hende a cuminza duna Gaby e apodo di ‘Mr. Baseball’ y esey ta algo cu keto bay hendenan ta usa pa yam’e.

   Algo ehemplar di Gaby ta cu semper desde decada di 1960, e tabata cuida y spaar tur potret, material, banderin, y trofeo cu e tabata obtene.  Despues cu el a sali for di e mundo comercial, el a haya tempo liber y asina a dicidi na organiza tur e recuerdonan aki, y na aña 2015 el a habri na su cas e lugar cu a bira conoci como ‘Museum Gabriel Illidge’.

   E museo a bira un berdadero showcase di e logronan di e epoca di Gaby den mundo di Baseball.

   Na 2015 tambe el a lanza e buki titula Gabriel ‘Mr. Baseball’ Illidge, Player, Leader and Businessman’.  Un buki skirbi pa Dufi Kock, cu ta contene e historia di Baseball di Gaby Illidge, y tambe historia di su negoshi Gaby’s Sportshop na San Nicolas.   Segun e autor Dufi Kock, e ta convenci cu Gaby Illidge ta e persona mihor honra den Baseball na Aruba.

   Na su famia, conocirnan, coleganan den Baseball, y mundo deportivo na Aruba, DIARIO ta extende su mas profundo palabra di condolencia.  Gaby a bay laga nos cu 83 aña di edad.