Sharline Koolman di DVG: - ORANJESTAD (AAN): Aruba conoce casonan di e asina yama Variante Delta di COVID-19.
Durante un conferencia di prensa Dialuna Sharline Koolman di DVG a indica cu a haci varios test pa check e cantidad di caso di e variante Delta den ultimo simannan y a constata cu te ainda den e ultimo 3 simannan a detecta 11 caso di e variante aki na Aruba.
“Nos tur sa cu e variante Delta ta hopi mas contagioso y mas e ta circula e chens ta bira mas grandi cu e ta plama y esaki sigur no ta mucho bon noticia, si nos wak kico a sosode den fin di siman”.
For di e Crisis Team nos ta di opinion cu bo no por sigui babysit hende, pero tur hende mester percura pa cuida, segun Koolman.
El a sigui bisa cu si hendenan sigui cu nan comportacion sin tene cuenta cu e virus, e ta bay sigui plama mas na Aruba.
Segun Koolman, Hulanda a introduci medida nobo atrobe debi na e aumento den casonan di contagio y esaki tin di haber cu e variante Delta.
Si na Aruba e casonan cuminza aumenta atrobe, Hulanda lo sugeri na Aruba pa introduci cierto medida atrobe y e ora ey e Crisis Team mester sinta bek pa evalua kico mester sosode.
Koolman a indica cu el a wak cu Aruba tin hopi turista cu a bin pasa un bon y safe vakantie riba nos isla, pues nan no a bin pa mira situacionnan di problema na Aruba.
“Por fabor ban uni cabez pa nos sali di esaki”, segun Koolman.
El a bisa cu di e personanan di 18 pa 60 aña di edad na Aruba 60% a wordo vacuna, mientras cu di 60 aña bay ariba tin 73% vacuna.
Segun Koolman, semper a bisa cu pa mantene un comunidad mas safe posibel, lo ta bon pa 85% di e poblacion ta vacuna.
Mirando e rapidez cu cual e variante Delta ta plama, awor World Health Organization (WHO) ta sugeri pa mas cu 85% di bo poblacion wordo vacuna.
