Jeamiree van der Werf: --- ORANJESTAD (AAN): Pe a Siman di Lantamento di Mucha cu ta e siman aki, tin diferente actividad planea.
Durante un conferencia di prensa Diahuebs mainta, Jeamiree van den Werf di Fundacion Respetami a papia riba e actividadnan aki.
El a splica cu ta bay tin diferente actividad pa celebra e derechonan di mucha.
Awe ta bay tin un celebracion na Centro di Bario Playa Pabao cu ta bay ta di 3’or di atardi te cu 8’or di anochi.
“Esaki ta un actividad cu nan ta haci tur aña y nos ta invita tur mayor pa asisti na esaki hunto cu nan yiunan”.
Tambe ta asina cu Telefon pa Hubentud hunto cu Cedem ta bay lanza nan proyecto ‘Chit Chat’, cu ta bay ta di 9’or te cu 11’or di mainta, segun van der Werf.
El a sigui bisa cu Diasabra dia 20 di November ta bay tin un caminata organiza pa Gobierno di Aruba cu ta cuminza 7:30 na Djiespies Place, pa asina e muchanan por cana hunto cu e derechonan cu nan ta representando.
Na final di esaki lo tin un actividad chikito pa e muchanan a Plaza Padu.
“Diasabra ta bay tin tambe e campaña di Bright Bakery cu ta un campaña cu a cuminza na comienzo di December, pa para keto na tur e derechonan di mucha”.
Diasabra awor e campaña ta termina y lo saca e ganador di e premio di campaña.
Tur esaki ta pa mustra con importante e derechonan di mucha ta, segun van der Werf, kende a indica cu esaki ta bay ta 11’or di mainta.
El a sigui bisa cu ta bunita pa wak con mas y mas sector priva ta mustrando e importancia di por contribui tambe na e sector social den e forma aki, door di para keto y traha hunto riba e derechonan di mucha.
“Diasabra pa 4:30 di atardi ta bay tin un ‘Walk & Run for Kids’ di Malmok Runners, cu ta un actividad specialmente traha pa e siman di derechonan di mucha”.
Dia 22 di November nos ta bay tin nos mainta, unda cu profesionalnan di diferente instancia lo participa na entrevista, unda cu nan lo duna mas informacion di nan servicionan, pero tambe nan lo para keto na e 6 ‘bouwstenen’ di e Vision Pedagogico.
Den e siman di 22 pa 26 di November lo tin diferente entrevista cu profesionalnan riba e aspecto di salud mental y riba lantamento di mucha, segun van der Werf.
Asina el a menciona mas actividad cu lo tuma lugar relaciona cu e importancia di e derechonan di mucha.
