Prome Minister: *Huur a subi for di 36 mil florin pa 3.3 miyon florin pa aña
ORANJESTAD (AAN): Prome Minister Evelyn Wever - Croes durante e reunion publico den Parlamento pa trata e Nota di Fin di Aña 2022 (Najaarsnota 2022), contestando preguntanan haci tocante e MFA-nan, a duna un splicacion di esakinan y e status di MFA San Nicolas, dicon San Nicolas nunca a haya su MFA, pero tambe dicon no ta dunando e mesun servicio na e Hulpbestuurskantoor San Nicolas, compara cu por ehempel na Censo.
Kico a bay fout?
Den e proyecto aki, diferente cos a bay fout, e gobierno e tempo ey a bisa cu lo construi 5 MFA y cu mester bay paga 3.3 miyon florin pa aña na huur pa e 5 edificionan aki. Prome Minister a splica cu como oposicion e tempo ey a haci hopi pregunta den Parlamento, pero niun a wordo contesta. Sinembargo e Parlamentarionan a firma y e MFA-nan a bin. E placa a wordo poni disponibel pa ehecucion di e proyecto aki, pero manera pueblo por a mira, ta pagando actualmente pa 5 edificio pero a haya 4. Noord, Paradera, Santa Cruz y Savaneta, pero despues placa a caba, pues San Nicolas no a haya.
Remarcabel ta cu antes tabata paga 36 mil florin pa aña pa tur hulpbestuurskantoor na Aruba, varios tabata propiedad di Gobierno y otronan tabata huur. Aworaki ta pagando 3.3 miyon florin pa aña, faltando esun na San Nicolas. Esaki ta un aumento di 9000%.
Situacion actual
Lamentablemente e situacion ey a pone cu tin un problema grandi, pasobra e hulpbestuurskantoor na San Nicolas mester wordo renoba. Actualmente no por ni duna servicio di cahera di impuesto mas, consecuentemente nan a sali y bay den e edificio di Postkantoor pa motibo cu e edificio no ta adecua. Hulpbestuurskantoor ta den e edificio ainda pero no pa mucho tempo mas.
Tin un poco tempo caba trahando riba un plan pa inverti den e edificio. E idea ta pa percura pa remodela e edificio y amplia e servicionan, pero esaki lo conduci na aumento di huur. AIB ta disponibel pa financia e proyecto, pero como cu lo mester bay paga mas huur lo mester bin Parlamento pa aprobacion, Prome Minister Wever - Croes a splica. Actualmente Ta wardando riba e finalisacion di e proceso aki pa tine riba papel pa presenta na Parlamento cu ne.
Finalisando Prome Minister a bisa, e intencion ta pa inverti den e edificio pone funciona optimal y cu e caha di DIMP por duna servicio bek eynan. Despues lo trata e diferente servicionan di Censo, kier trece un loket di Dimas (tin cu regla esaki cu Minister Glenbert Croes) y un presencia mas estable di Directie Sociale Zaken (mester caba di regla esaki cu Minister Rocco Tjon). Di e forma aki ta aumenta e servicionan cu ta duna na e pueblo di San Nicolas.
