Director di CMO, Rino Hermans:
*Lo wak actividad mas frecuente den e sistemanan
*Minister Presidente so por pone Aruba alerta
ORANJESTAD (AAN) – Director di Crisis Management Office (CMO), Rino Hermans, a splica cu e pronostico cu tin, ta cu den e di dos mitad di augustus awo, humedad den atmosfera ta bay subi, y ta bay wak actividad mas frecuente di e sistemanan cu lo haya nomber.
“Nos tin varios tropical wave cu a pasa caba pero e aire no a duna nan chens di desaroya. Pero den e segundo parti di Augustus si nos ta bay wak un Atlantico hopi mas activo, y nos ta monitor esey di cerca, pa tur hende sa 120 ora prome, un bez cu e desaroya y haya nomber nos ta bay wak su rumbo y nos ta alerta e pueblo pa hunto nos pasa door y prepara pa e sistema” señor Hermans a expresa.
El a añadi cu manera CMO ta bisando varios biaha caba, bay tras di e sistemanan di informacion oficial, y no bay tras di comentarionan a traves di social media.
“Y no tin ningun hende, si no ta prome minister, cu por pone Aruba riba un alerta total. CMO ta recomenda prome minister pa pone un alerta y e tin cu yama un rueda di prensa”, Rino Hermans, director di CMO a señala.
