Ronella Croes, CEO di ATA, ta splica:
*Bishitantenan ta custumbra cu otro metodonan di pago
*Aruba mester por haci esaki disponibel tambe
ORANJESTAD (AAN)—CEO di Aruba Tourism Authority, Ronella Croes, a referi den entrevista cu Matutino DIARIO, na e plataformanan di pago PayPal y Bitcoin, cu ta un tema cu ta wordo trata desde añanan atras, pero cu aworaki ta parti di un Comision, como un iniciativa di Banco Central di Aruba, cu ta Comision Foro di Pago Nacional.
“Anto, e Foro di Pago Nacional, ta unda nos ta papia tocante temanan aki cu Banco Central. Pues, e hecho cu nos bishitantenan (no solamente hobennan) ta custumbra cu otro tipo di metodo di pago for di unda nan ta bin, nos mester haci esaki disponibel tambe na Aruba, y mas normal p’asina no solamente den sanger di e bishitante, incluso e hoben, por haci pagonan mas facil”, Ronella Croes a señala.
El a splica cu ATA su nocion ta cu mas facil bo por haci pagonan kizas por stimula e bishitante pa gasta mas.
“Pues, esey ta un analisis cu a wordo haci añanan pasa, y cu kizas nos por haci atrobe, pero esey ta hop importante. Pues den e Foro akinan, e topiconan aki ta biniendo dilanti”, Ronella Croes a indica.
El a subraya cu e liderazgo ta bao di Banco Central di Aruba, y e Foro ta inclui hopi stakeholders. Kiermen, ATA ta un di nan. CEO di ATA ta sigur cu Minister di Asuntonan Economico tambe ta forma parti.
