Señora Romely Flanegin:
- Pa nan tambe sostene e puntonan di campaña
ORANJESTAD (AAN) – Romely Flanegin, directora di Tienda di Educacion, a menciona cu nan a reuni cu SMAC tambe, pasobra nan deseo ta cu nan yuda sostene tambe e puntonan di e campaña Mucha y Hoben safe den Carnaval.
Nan a reuni cu e gruponan di carnaval tambe, y el a keda contento y gradici cu algun grupo a tuma flayers di e campaña y mayornan cu a inscribi nan yiunan a haya un flayer tambe.
Flanegin a señala cu nan kier bay den e direccion cu e gruponan di carnaval tambe ta tene cuenta cu e area di edad y otro puntonan di seguridad cu a bin dilanti.
Ta importante pa e mayornan busca mas informacion, tanto cerca Tienda di Educacion como tambe Fundacion pa Nos Muchanan, Departamento di Asunto Social, Fundacion Respetami, y WGK.
“E idea ta cu nos tur ta carga esaki y nos tur tey pa sostene mayornan. Nan ta pone algun punto pa hoben y mucha cu mayornan ta bisa cu ta dificil pa ehecuta. Por ehemplo cu e mucha no kier tende, cu e kier haci su kier, y nos ta bisa nan cu nos tey pa sostene e mayor. Yama nos, y nos ta wak con nos ta haci pa yuda den esaki”, señora Romely Flanegin a expresa.
