Den diesdos luna e Bestaansminimum pa un famia a subi cu 138 Florin

Dato di Juli 2026 a drenta...

ORANJESTAD (AAN): E siman aki, Oficina Central di Estadistica (CBS) a saca nan rapport di Indice di Prijs di Consumo (CPI) cu ta vigila inflacion, y tambe e conocido ‘Bestaansminimum’.

   Manera ta conoci, Bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña.

   Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 15+) y un peso di 0.3 pa cada mucha (edad 0-14). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual.

   Cifra di Juli 2026: E unidad di referencia den e rapport aki ta di un hogar cu ta consisti di 2 adulto y dos mucha (edad 0-14).

   Na juli 2026, e bestaansminimum mensual pa un hogar consistiendo di 2 adulto y dos mucha (edad 0-14) ta 5.634, un aumento di 138 Florin compara cu Juli 2025 (Afl. 5,496). E aumento aki a wordo causa principalmente door di aumentonan di 80 Florin y 27 Florin den e sectornan “Cuminda y bebida no alcoholico” y “Transporte”, respectivamente. E caida mas grandi na juli 2026 a wordo registra den e sector di “Mobilario” (Afl. -8).

   Na juli 2026 e bestaansminimum mensual pa un hogar cu ta consisti di un solo adulto ta Afl. 2,683, cual ta resulta den un deficit di entrada di Afl 676. Esaki ta representa un aumento di Afl. 45 compara cu e deficit observa un aña pasa (Afl. 631). E deficit aki ta esun mas halto registra pa luna di juli durante e ultimo 6 aña.

   Pa clarificacion, CBS a agrega dos columna na Tabel 3: (1) e reparatietoeslag, cu ta brinda sosten adicional na trahadonan eligibel; y (2) e deficit di entrada calcula, cu ta wordo reduci por medio di e suma aki, y asina ta mehora e posicion financiero di trahadonan cu salario minimo.  E metodologia actual lo wordo manteni pa sigura consistencia y comparabilidad.