Den debate Mike mester admiti cu e ta autor di desgracia di Aruba

Segun investigacionnan di DIARIO 2018-2021 Mike a maltrata bon gobernacion - *Aruba mester di contesta di tur medida cu mester a tuma y lo tuma pa scapa Aruba - *Nomber di grupo beneficia den proyectonan miyonario mester wordo investiga

ORANJESTAD (AAN) — E debate di Camara di Comercio ta wordo considera door di Pueblo di Aruba como un oportunidad pa el a ricibi informacion general di loke a pasa cu Aruba.

En espera di e segunda tanda di e debate, DIARIO a atende cu opinionnan cu ta biba den Pueblo pero tambe a conclui investigacionnan cu el a haci for di 2018 pa 2021.

Na 2018 tabata tin suficiente prueba pa conclui cu Mike Eman a pusha Aruba den abismo cu su maneho di fantasia pa cual el a wordo adverti pa instancianan oficial, cu den nan rapportnan ta duna prueba cu Mike Eman ta autor di e desgracia di Aruba.

Awe DIARIO ta publica tur prueba cu intencionalmente Mike Eman a causa caida di Aruba for di 2009, ora el a presenta su plan di gobernacion cu cual el a busca vota pa e asumi poder di e pais.

Awe DIARIO, haciendo uzo di informacionnan oficial, ta presenta na Pueblo di Aruba con Mike Eman a hinca Aruba den un desaster total dor di deshaci di mita BBO, cu tabata uno di e decisionnan mas grandi den historia di Aruba, pero pa cual Mike Eman no tabata tin ningun documento pa tene su mes.

Pa huzga loke Mike Eman a haci cu Aruba, mester lesa e relato cu Raad van Advies, e organo cu ta conseha Parlamento y Gobierno riba leynan cu mester pasa, a manda pa Mike Eman.

Na e momento cu Mike a bira Prome Ministro, el a manda pa Raad van Advies su plan pa deshaci di mita BBO, pero cu hamas Mike Eman a studia.

Mike Eman a basa su mes riba loke e mes y otro personanan a pensa y a entrega un rapport cu cifranan bieu cu no tabata papia di resultadonan di BBO pa Aruba, como motibo pa cual e mester a baha BBO. E otro rapport cu el a presenta tabata un documento cu practicamente tabata basa riba e deseo di AVP pa baha BBO pasobra asina lo a pone cu hende ta gasta mas placa, loke ningun momento por a proba.

Den e relato cu Raad van Advies a manda pa Mike Eman y den cual nan a bisa Mike kico e ta haci cu Aruba, nan a mustra cu ora a introduci BBO, a baha otro tiponan di belasting directo.

Esaki lo a haci cu si baha BBO, mester a presenta otro entrada pa Aruba, loke Mike Eman no a haci.

E graficonan cu DIARIO ta presenta awe, ta mustra bon cla, kico Mike Eman a haci cu Aruba na momento cu e pais mester a busca mas entrada pasobra mundo tabata den e Great Recession cu a afecta mundo mientras cu Valero tambe tabata prepara pa bandona Aruba debi na su resultadonan cu a baha.

Mike a hunga weganan falso cu Pueblo di Aruba, cu el a manipula cu informacionnan cu no tabata cuadra, proyectonan cu lo a destrui Aruba manera ta e proyectonan di PPS cu ta cubri cu misterio y mas misterio.

Cantidad di tereno a wordo cumpra. Un grupo di personanan desconoci a wordo beneficia directamente cu e proyectonan cu a costa demasiado placa na un pais chikito y cu hamas Aruba por a paga.

Den e debate di Camara di Comercio, cu ta conoci cu e impacto destructivo cu e maneho di Mike Eman tabata tin pa Aruba, mester bini dilanti con Mike a hiba un maneho den cual el a causa un aura di gloria pa su propio persona, a beneficia directamente cantidad di persona pa medio di su proyectonan y decisionnan despues cu el a kibra entrada di Aruba.

Den e debate di Camara di Comercio mester bini dilanti con Mike a haci Aruba pober y asina a kibra e base comercial sano di Aruba, cu ta basa riba e compra di poder di tur hende, cu e tabata sa cu lo wordo afecta ora medidanan mester a wordo tuma pa reemplasa placa di caha di Aruba, cu el a uza contra tur regla di bon gobernacion.

DIARIO durante conversacionnan cu expertonan cu a guia estudionan den rapportnan cu DIARIO a presenta na Pueblo, a haya confirmacion cu ta un berguensa cu awe Mike Eman ta parti di debate pa futuro di Aruba, cu el a kibra for di momento cu el a presenta su pakete falso di mita BBO pa asina haya voto di Pueblo!

Den e debate di Camara di Comercio pues mester bini dilanti, cuanto placa Pueblo mester a paga pa medida cu tabata basa for di e prome momento cu Mike Eman a sinta riba stul di Prome Ministro di Aruba te na e momento cu el a baha.