Rapport Bo Aruba no por muri y mester proteha bida di e Arubiano --- *Ex Prome Ministro Mike Eman responsabel pa calamidad actual --- *Cu ayudo di mayoria totalitario el a trapa riba ley y control di placa
ORANJESTAD (AAN) — Riba 10 di januari 2018 uno di e rapportnan mas importante cu historia di Aruba como pais autonomo den Reino Hulandes a yega di conoce, a haya su base legal como instrumento di control di Pueblo, na momento cu su contenido a wordo establece dor di Algemene Rekenkamer Aruba, e autoridad mas halto di control financiero di Aruba.
Algemene Rekenkamer Aruba tin e tarea pa vigila con cada cent di Aruba ta wordo gasta y pa determina si esaki ta di acuerdo cu Ley cu ta proteha e bienestar di e Arubiano.
E rapport aki a keda scondi pa Pueblo di Aruba na eleccion 2017, ora ya no a resta mucho di Aruba, cu tabata sink riba terreno financiero, economico y social.
Kico a pasa cu Aruba, cu Pueblo di Aruba y cu placa di Aruba, a keda hancra den e debe nacional pero na un forma mas comprimi pa Pueblo den e rapport cu Algemene Rekenkamer Aruba a presenta di e abuso di placa di Pueblo contra Ley, a tuma lugar pa medio di e proyectonan di Bo Aruba.
DIARIO, cu Ley di Contabilidad cu ta dicidi con ley ta permiti pa gasta placa di Pueblo, a mustra kico a pasa cu Pueblo di Aruba cu no solamente a perde placa pero directamente a bira victima di e maneho di Mike Eman.
Con serio e contenido di e Rapport Bo Aruba ta, ta bini dilanti awe den seno di Husticia, caminda pruebanan palpabel ta wordo duna di e realidad cu e reconstruccion di hospital di Aruba, no ta cuadra cu exigenciana di Ley, cu ta exigi pa gobernantenan traha na bienestar di Pueblo riba tereno financiero pero tambe tur otro tereno.
Informacionnan cu DIARIO tin di discusionnan legal na e nivel mas halto den sistema di Husticia na Aruba, ta duna prueba, cu awe un Parlamento di Aruba tin e deber pa start un Encuesta Parlamentario riba loke Gobierno Mike Eman a haci cu sector di cuido di Aruba y sigur e hospital, cu ta central den den e lucha di e ciudadano Arubano pero tambe e bishitantenan di e pais.
Manera DIARIO a adverti, e formulanan cu Gobierno Mike Eman a uza pa e proyecto di Hospital, ta un calamidad administrativo, manera ta e caso cu henter e concepto di e proyecto “Bo Aruba”, cu ta basa riba un pica mortal contra ley, cu ta uza placa cu e Pueblo no tin, aumenta e debe cu ta crea cu debe di interes, y hinca e Pueblo di Aruba den un desastre financiero cu ta e realidad di Aruba awe.
Salud Publico, Salud di Pueblo, no ta permiti aventura manera a wordo hunga cu e proyecto hospital, cu Parlamento mayoritario y totalitario di AVP cu AVP di 2009 pa 2017 a pone den man di Mike Eman sin cu Hulanda tabata capaz pa controla si placa di Pueblo tabata wordo bon gasta.
Awe Aruba ta den un calamidad total pa loke ta trata hospital, alma di ciudo medico di Aruba, pa motibo di e proyecto Hospital, cu a costa Pueblo di Aruba un capital, cu no ta sirbi interes di Pueblo y no ta duna e garantia legal, cu segun Ley di Contabilidad tur proyecto mester duna.
Manera ta e caso for di 2018, DIARIO ta sigui expone e abuso cu a wordo comete dor di Gobierno Mike Eman contra Pueblo di Aruba y cu directamente ta mete cu e bienestar basico di e Arubiano, cu ta salud di e Arubiano cu e situacion di e hospital ta pone na peligro.
Segun reglanan internacional, un hospital mester coresponde na cierto reglanan pa e por tin nomber di hospital y cada departamento di e hospital mester ta funciona di tal forma, cu e por fungi como central di cuido medico sin ningun peliger pa e pashent.
Mescos cu tin reglanan pa e expertonan medico cu ta atende cu cuido di hende, tin regla pa un hospital por yama su mes hospital y DIARIO lo duna Aruba tur informacion y tur detayes di leynan cu ta proteha bida di hende.
Cu e actual informacionnan cu DIARIO tin y cu e ta discutiendo atrobe cu expertonan local y internacional y conociendo Constitucion y tur ley basico di Aruba, DIARIO ta sostene e informacionnan di expertonan cu ta exigi pa Parlamento di Aruba duna inicio na un Encuesta Parlamentario den cual bou huramento, personanan cu por duna informacion riba e proyecto hospital y e calamidad cu hospital a bira pa Pueblo di Aruba, por declara y splica Pueblo di Aruba kico a pasa cu e Hospital cu Gobierno Mike Eman a laga como herencia pa Pueblo di Aruba.
