Minister Geoffrey Wever
- Esey ta confirma confiansa den economia di Aruba
ORANJESTAD (AAN): Gobierno di Aruba, pa medio di Minister di Finansa, Asuntonan Economico y Sector Primario, Geoffrey Wever, ta anuncia cu e emision reciente di dos bono local a resulta den un exito rotundo, demostrando un confiansa fuerte di mercado local den maneho financiero di pais.
Den e proximo tres luna Aruba mester paga bek casi 165 miyon na debenan cual mayoria ta debenan cu ta mas di 10 aña bieu. Pa por paga esaki gobierno a emiti dos bono. Mientras gobierno a busca 165 miyon florin den mercado local, e mercado mes a pone 380 miyon florin disponibel. E oferta ta casi 2.3 biaha mas grandi cu e necesidad. Ambos a bay na un interes competitivo, di 5 te cu 6%. Esaki ta confirma confiansa den finansa y economia di nos isla.
"Esaki ta mustra claramente cu e mercado, tanto local como internacional, ta tene Aruba na un nivel halto di confiansa," segun Minister Geoffrey Wever.
E gran demanda a resulta den un interes atractivo cu ta refleha den un agio di casi 10 miyon florin, un beneficio directamente pa e fondo publico. Casi mitar di esaki lo wordo uza pa inversion pa sigui stimula economia y e otro mitar lo bay pa sigui baha debe.
Aunke ta trata di un prestamo nobo, Minister Wever a splica cu esaki no ta debe nobo y no lo aumenta e debe nacional di Aruba. E fondonan ta bay completamente na paga riba debe bieu, mayoria emiti prome cu COVID. Pa 2025, Aruba mester paga 534 miyon florin riba 16 prestamo. Pa cubri e suma aki, Parlamento a autorisa minister di finansas pa refinanciamento di 456 miyon florin, pero danki na e agio logra, Gobierno lo uza solamente 451 miyon florin.
Debe ta na su punto mas abou den añanan: E nivel di debe, cu a yega su punto mas halto na 127% di GDP durante COVID, pero esaki a wordo baha rapidamente pa 70% den prome kwartaal di 2025. E debe di awe ta na un nivel comparable cu 2013.
Confiansa base riba resultado: Diferente factor importante a contribui pa nos a yega na e nivel di confiansa aki, entre otro, Aruba tin un historia di pago na tempo y completo; tin un compromiso real pa stabilisa y baha debe; nos a demostra resiliencia economico durante pandemia; nos a sa di mantene tres investment grade ratings den ultimo añanan.
Financiamento internacional y dialogo cu Hulanda: Aruba ta prepara pa emiti bono internacional den e proximo lunanan pa asina cubri e resto di financiamento. Un proposicion lo wordo presenta na Rijksministerraad pa un prestamo di maximo US$ 150 miyon. Mientras tanto, Aruba ta sigui cu dialogo cu Hulanda pa financiamento adicional pa sigui garantisa cumplimento cu nos inversionistanan pero alavez reduci gasto di interes y crea espacio pa por sigui paga debe mas rapido.
“Nos ta sigui proteha e reputacion di Aruba riba mercado financiero. Esaki ta esencial pa e bienestar y futuro di nos pueblo,” segun Minister Wever.
Aruba ta demostra cu maneho financiero responsabel y claridad den su strategia ta atrae inversion y fortalece su futuro economico.
