Demanda di energia ta sigui aumenta y constantemente ta monitor e carga riba e grid

Albertico Koolman, Ing. NV ELMAR:

ORANJESTAD (AAN) – Albertico Koolman, Ingeniero di NV ELMAR, den entrevista cu DIARIO a comenta cu e compania a constata cu e demanda di energia ta sigui aumenta.

            Koolman a indica cu constantemente nan ta monitor con e load ta riba e grid, y den e caso aki, e compania a bin cu un maneho nobo. Den pasado nos tabata bisa cu nos tin cabelnan di reserva cu si algo pasa un banda, semper nos ta switch bay otro banda.

            E biaha aki nan a dicidi pa parti e carga mas riba e cabelnan, den e caso aki ora cu esaki ta cuminza crece si tin un problema mes, of un fayo, no ta hopi hende ta wordo afecta.

            “Den e caso aki nos a purb’e dos luna pasa, segun mi tabata tin un temporada di hopi calor, nos a cuminza switch over, parti e carga mi over di e grid, y nos a ripara cu esey ta yuda hopi”, Ing. Albertico Koolman a señala.

            El a splica cu ora tin yobida, awa ta haci e liñanan limp pa nan, pero tambe nan ta bezig cu e plan di mantencion cu nan a cuminza cu ne, y por ripara cu enberdad e ta dunando su fruto.

“Bo ta ripara cu tin menos storing; berdad, no ta tur caminda nos a yega ainda, pero sigur unda cu nos yega y wak cu algo ta urgente, nos ta atende di biaha”, Koolman a señala.

El a agrega cu tin lugarnan cu tin cable y esey ta un tiki mas dificil pasobra mester bay pon’e den begroting, y e ora ey mester busca orden, coba, y tur esey ta tuma mas tempo.

“Pero nos tin nan riba nos lista, kiermen ora nos yega nos ta cuminza reemplaza esakinan”, Albertico Koolman a menciona.

            Locual NV Elmar tin riba plan nan ta sigui cu ne, nan no ta stop. “Den e caso aki nos no ta bay mesun  lihe cu nos tabata kier, pero e tin di haber tambe cu material. Nos no ta logra haya material na ora. Tin material cu mester a yega e luna cu a pasa y aworaki atrobe nan tin un luna di retraso. Nan ta yega na final di Augustus, y asina cu nan yega nos ta sigui traha riba dje”, Robertico Koolman a bisa.

            Hecho ta cu e consumo ta sigui subi, mas awo den tempo di vacancy, pero ora scol habri bek podise e consumo den dia lo baha un poco, pero esaki ta algo cu NV ELMAR ta bezig ta wak, Ing. Koolman a señala.