Delegadonan di Dutch Caribbean Agriculture Visioning Process a disfruta di un lunch traha cu productonan local

ORANJESTAD (AAN): Diamars mainta e delegadonan di Dutch Caribbean Agriculture Visioning Process tabata na Santa Rosa y nan a haya un muestra di e proyectonan agrario cu tin na Aruba.

Director di Santa Rosa Nathalie Maduro a splica cu e delegadonan a bishita diferente cunucu, incluyendo e cunucu di Jimmy.

Tambe nan a bishita Princes Amalia school y a wak un proyecto escolar di plantamento.

E grupo a bishita tambe HappyPonics, unda cu ta planta entre otro berduranan local

“Nos a ilustra na e delegadonan e diferente tipo di proyectonan cu no ta solamente di plantacion, pero tambe di produccion di honing, como tambe kico nos ta haci pa proteha abeha”, segun Maduro.

Alrededor di 1 or di merdia tur hende a come lunch y tur cos cu tabata tin riba mesa tabata produci na Aruba mes.

Di mushroom te cu papaya stoba, concomber chikito y balchi, e invitadonan a disfruta di cuminda produci na Aruba mes.

Studiantenan di EPI a coopera den tur esaki, mientras cu minister Ursell Arends tabata tey tambe den su funcion como minister di Naturaleza.