Delegacion di cunukero y piscado di Aruba rumbo pa conferencia na St. Maarten

ORANJESTAD (AAN): E siman aki, e delegacion di Aruba, encabeza pa Santa Rosa hunto cu diferente productornan local,

lo biaha pa isla di St. Maarten pa parti di e di ‘5th Dutch Caribbean Agriculture, Livestock & Fisheries Alliance Conference’.

   DIARIO a compronde cu e conferencia ta enfoca ariba strategia nan en conhunto pa establece siguridad di cuminda ariba e 6 islanan Hulandes y alavez ta enfoca ariba contratempo nan cu cada isla tin pa nan Sector Primario y mediante session nan educativo y participativo, ta trece posibel solucion nan dilanti cu cada isla lo mester enfoca ariba dje.

   E productor nan local a ser apunta door di Santa Rosa pa nan tambe por ta presente pa haya mas conocemento, establece contacto cu productor nan di e otro isla nan y alavez pa nan por tin un voz durante e conferencia.

   Mester remarca cu Gobierno Hulandes a cubri e gasto nan di e productornan local y Fundacion Hadicurari tambe tambe a cubri e gasto di su demas delegado nan.

   Durante e siman venidero lo bay ricibi mas informacion encuanto di e desaroyo nan tumando lugar na e conferencia.

   E delegacion lo consisti di Sr. Artur Giel como Presidente di Fundacion Hadicurari, Sr. Patrick van Brakkel como Piscador di Lionfish, Sr. Sherman Libiee - Piscador y Criador, Sra. Susan Sint Jago como consehero di Fundacion Hadicurari, Sr. Daryl Koolman di Koolman Farm y den representacion di United Farmers Aruba, Sr. Jair Britten den representacion di Comision Pro Cunukero Aruba, Sr. Byron Boekhoudt-Hefe di Seccion di Pesca di Santa Rosa y miembro di DCALFA y Sra. Nathalie Maduro, Directora di Santa Rosa y Presidente di DCALFA.

   Minister Wever tambe lo uni na e delegacion pa e parti oficial di e program y pa firma un MoU den nomber di Gobierno di Aruba como sosten na e aliansa agrario y di pesca.  E potret por mira e delegadonan den un reunion prome cu nan sali di viahe.