Deficit lo baha di 227 miyon florin cu ta 3.9% di GDP pa 148 miyon florin cu ta 2.5% di GDP

Minister di Finansa y Cultura Sra. Xiomara Maduro

 ORANJESTAD (AAN): Durante un conferencia di Prensa di Gobierno di Aruba, Minister di Finansa y Cultura Sra. Xiomara Maduro a presenta e Nota di Fin di Aña (Najaarsnota) 2022 cu ta contene e cambionan proponi pa Presupuesto 2022.

Conforme e ciclo presupuestario, prome cu fin di e aña  Gobierno ta presenta un cambio di presupuesto pa asina haya aprobacion di Parlamento pa e cambionan cu ta presenta durante e aña den gasto y entrada. E aña aki Gobierno a acelera e proceso presupuestario aki teniendo cuenta cu e ultimo conseho di CAft y e menaza pa Aruba haya un instruccion di Conseho di Minister di Reino.

Ta baha e deficit pa haci menos debe

E mandatario a splica cu Gobierno a haci diferente ehercicio pa por baha e deficit cu e meta pa fia menos y traha menos debe pa Pais Aruba. Cu e cambionan presenta e deficit lo baha di 227 miyon florin cu ta 3.9% di nos GDP, pa un deficit di 148 miyon florin cual ta 2.5% di nos GDP.

Entrada ta subi cu 47.1 miyon florin

Cu e cambionan presenta, e entradanan den Presupuesto 2022 ta subi cu 47.1 miyon florin. Den e Nota di Fin di Aña 2022  tin specificacion di e cambionan den entrada cu ta trata di, entre otro, impuesto dividendo, Landspakket, subsidio di salario y deviezenprovisie.

Gasto ta baha cu 16.6 miyon florin

Pa locual ta e gastonan, entre otro, gasto di Personal ta baha cu 7.5 miyon florin, y gasto di Servicio y Producto ta baha cu 13.5 miyon florin. Den total e gastonan den Presupuesto 2022 lo baha cu 16.6 miyon florin.

E deficit lo wordo reduci cu 79.3 miyon florin

Den e  Presupuesto 2022 aproba pa Parlamento di Aruba, e deficit tabata 227 miyon florin cual ta 3.9% di GDP. Cu e cambio proponi lo baha e deficit cu 79.3 miyon y e deficit lo bira 148 miyon florin cual ta 2.5% di GDP.

E Ley pa haci Cambio den Presupuesto 2022 ta cana su caminda pa Parlamento

Minister Maduro a splica cu e Ley pa haci Cambio den Presupuesto 2022 awo ta cana su caminda pa por yega na Parlamento. Awo e concepto di Ley ta pa bay CAFT y Raad van Advies pa conseho. Asina cu e consehonan wordo ricibi, Gobierno di Aruba lo atende cu e consehonan y despues lo presenta e Ley pa haci Cambio den Presupuesto 2022 na Parlamento pa e wordo trata.