Defensa Region Caribense a brinda colaboracion Internashonal durante training di ‘Tradewinds’

ORANJESTAD (AAN): Defensa Region Caribe Hulandes a participa cu mas di 100 Militar Hulandes y di Curaçao na un entrenamento internacional yama “Tradewinds”. 

E ehercicio a tuma luga di 4 te cu 16 di Mei na Barbados, entre otro como preparacion  pa e temporada benidero di horcan y pa reforza colaboracion Internacional.

   Hunto cu e.o. Merca, Canada, Francia y diferente pais di Karibe, Defensa Region Caribe Hulandes  a partisipa na e ehercicio “Tradewinds” na Barbados. Cu un total di 26 pais participante y mas cu 1.000 militar, dos siman largo a inverti den e colaboracion Internacional.

    E aña aki e enfoke di e ehercicio tabata riba yudanza humanitario,  e lucha contra di desaster y entrenamento contra menazanan cu Region Karibe lo por haya su mes envolvi den dje den futuro.  Pues e Marineirnan entre otro a realisa ehercicionan di abordahe, en cooperacion cu Militarnan Mericano; Militarnan di Curaçao a realisa hunto cu Militarnan Mericano, operacionnan den zonanan urbano y e patruyero Zr.Ms. Pelikaan a haci ehercicionan di maniobra, hunto cu entre otro Navenan di Marina di Republica Dominicana, Canada y Francia.  

    Defensa Region Caribe Hulandes a participa na “Tradewinds’ cu Militarnan di Curaçao, barco Patruyero Zr.Ms. Pelikaan, Marineirnan di Escuadron di Marina Aruba, Marineirnan di Destacamento St. Maarten y gruponan di boto tanto di Aruba como Curaçao. 

    Defensa ta entrena varios biaha pa aña pa yudansa di emergensia durante horcan.  Asina ademas di e ehercicio “Tradewinds” na September durante e temporada di horcan, tambe e ehercicio  “Windward Express” ta tuma luga na Islanan Ariba.  Cu yudanza di e sorto di ehercicionan aki  Defensa ta prepara pa dunamento di yudansa den emergencia (humano) na momento cu esaki ta necesario.