Caso di Otmar:
ORANJESTAD (AAN): Un analisis detaya di e sentencia recien emiti pa Hof a resalta varios punto critico cu, segun e ekipo di defensa di Otmar Oduber, ta mustra cu e decision huridico aki no ta completo y ta contene fayonan substancial. Despues di un evaluacion di e contenido, a keda confirma cu e pelea huridico aki no a yega na su fin, ya cu e caso lo keda presenta awor dilanti di Hoge Raad na Hulanda via un proceso di cassatie.
Tres punto cardinal di obhecion: E desacuerdo cu e sentencia ta basa primordialmente riba tres argumento principal cu ta cuestiona e substanciacion y e evaluacion di e pruebanan pa parti di Hof:
(1) Defensanan sin consideracion ni splicacion: Hof no a drenta den e detayenan di tur e puntonan di defensa cu a keda presenta. Mas aun, e tribunal no a duna un motivacion of splicacion di con ni pa kico a dicidi di no tene e defensanan aki na cuenta.
(2) Uzo di evidencia contradictorio: A haci uzo di cierto elementonan di prueba den e dossier, mientrastanto cu den e mesun dossier ey tin otro pruebanan cu ta demostra exactamente lo contrario.
(3) Falta di motivacion pa condena: Hof a conclui cu tin suficiente evidencia pa yega na un condena, sinembargo a faya den splica y fundamenta e rasonamento tras di e conclusion ey.
Ignora testigonan: Tambe a djis tene cuenta unicamente cu Landsrecherche y ignora testigonan
Un di e fayonan mas mira di e proceso aki, segun e defensa, ta cu Hof a fia casi exclusivamente riba e investigacion y e dossier presenta pa Landsrecherche, sin duna e peso debi na e declaracionnan di mas cu 25 testigo cu a wordo scucha y cu a contradeci e version oficial.
Den varios instancia, interogatorionan inicial di Landsrecherche tabata poco cla. Ora cu e testigonan aki a presenta dilanti di Rechter-Commissaris (RC), nan a clarifica nan declaracionnan, demostrando cu e anotacionnan di Landsrecherche no tabata cuadra of a wordo malinterpreta. Pesey, e hecho cu Hof a scoge pa ignora e clarificacionnan aki dilanti di RC y keda unicamente cu e version di Landsrecherche ta keda considera un fayo grandi cu no ta usual den e administracion di husticia.
E paso pa Cassatie na Hoge Raad: Despues cu Otmar a tuma e decision personal di bay den cassatie, e decision aki a ricibi pleno apoyo di su ekipo legal. Maske e proceso di cassatie ta exigi un abogado specialisa na Hulanda, e evaluacion preliminar ta indica cu tin fayonan huridico evidente cu mester wordo revisa.
E papel di Hoge Raad den un cassatie no ta pa bolbe evalua e echonan of e pruebanan di e caso, sino puramente pa controla dos aspecto fundamental:
(*) Si Hof a aplica ley na un manera corecto.
(*) Si Hoge Raad duna e defensa rason y anula e sentencia, e caso lo wordo manda bek pa Hof pa wordo trata di nobo, habriendo e caminda pa un reevaluacion obhetivo di tur e defensa- y testigonan cu a keda saca anteriormente.
Riba e potret por mira abogado mr. Carlo.
