Tratamento historico presupuesto di Hulanda den porta di eleccion
- E bom cu DIARIO a anuncia ta rementa den prensa Hulandes
- Gobierno Rutte a produci votador Hulandes pober na pais rico
ORANJESTAD(AAN)- E situacion cu a surgi den Reino a base di e maneho di Gobierno Hulandes dirigi pa Mark Rutte, ta permiti Reino Hulandes na e momentonan introduci un Ley di Reino pa supervision di Aruba?
Esaki ta e pregunta grandi cu ta bini dilanti despues di Prinsjesdag Diamars dia 19 di November, ora e Presupuesto di Reino y e Presupuesto di Hulanda, a wordo entrega na Tweede Kamer.
Cu despues di e desaster financiaro cu a wordo ocasiona dor di Gobierno Mike Eman y cu a wordo aplaudi na inicio dor di Mark Rutte mes, mester tin un forma pa evita ripiticion di “Mitar BBO”, DIARIO tabata di acuerdo.
Sinembargo, e pregunta grandi a keda si Statuut ta permiti pa deshaci di e autoridad di Parlamento y ta exigi reglanan nobo wordo impone pa medio di un Ley di Reino, cu ta realmente un Ley di Gobierno Hulandes den practica, y no dor di un Ley di Aruba.
DIARIO for di prome momento a mustra cu e exigencianan Hulandes ta mara na e situacion politico di Hulanda, caminda partidonan politico nobo ta duna tur indicacion di lo trece cambio grandi den e constelacion di Tweede Kamer, durante eleccion pa Parlamento Hulandes, fin di November.
DIARIO for di momento cu Gobierno Hulandes a pone ultimatum pa Gobierno di Aruba acepta supervision di Reino, a mustra cu esaki ta motibo di e situacion politico na Hulanda, caminda pobreza ta crece y ta afecta un grupo creciente di comunidad.
Diamars, e ultimo Gobierno di Mark Rutte, a entrega na Parlamento (Tweede Kamer) Hulandes, e cifranan cu el a prepara pa goberna Hulanda na 2024 y e cifranan pa gobernacion di Reino (incluso Aruba).
E cifranan pa Hulanda, manera DIARIO a adverti, a causa cu e bom contra gobernacion di Mark Rutte na Hulanda a rementa.
Medionan di comunicacion Hulandes, a lansa e pregunta grandi cu DIARIO ya a ofrece na Aruba. “Con por ta posibel cu un pais rico manera Hulanda, conoce pobresa”?
Esaki ta e pregunta cu tabata conoci pa Gobierno Rutte for di prome cu el a entrega su presupuesto na Parlamento Hulandes.
Manera DIARIO a anuncia den su prome edicionnan di e siman aki, miembronan di Gabinete Mark Rutte di Hulanda, na careda a ahusta nan cifranan y a scrap entre otro e cifranan mas abou pa asistencia na ancianonan y otro medidanan importante cu ta afecta e costo di bida y haci esaki imposibel pa un bida aceptabel pa e ciudadano Hulandes.
Den medionan di comunicacion Hulandes por lesa awor, con e maneho di Gobierno Rutte, manera DIARIO ya a trece dilanti, a bira pobresa creciente na Hulanda, uno di e paisnan mas rico na mundo.
Informantenan di DIARIO awor ta cuestiona si e gobernante Hulandes, cu a faya cu e Pueblo Hulandes te na e grado, cu partidonan nobo ta score manera tur cos ta mustra den eleccion na November na Hulanda, por exigi pa Gobierno di Aruba cu sosten di Parlamento di Aruba, acepta supervision financiero di Hulanda na Aruba.
E presupuesto Hulandes pa 2024, segun informantenan di DIARIO, ta papia di un total di gasto di 430 Miljard Euro pa Gobierno Hulandes cu un entrada di 402 Miljard Euro.
E debate den Tweede Kamer riba e maneho financiero di Hulanda na 2024, a haci medionan di comunicacion di Hulanda mustra Pueblo cu Hulanda ta den porta di eleccion, cu ta haci influencia riba su actitud y decisionnan di politiconan di e pais.
Medionan di Comunicacion Hulandes ayera a papia di e forma cu e maneho di e pais rico Hulanda, a base di e costo di bida halto cu a resulta di e maneho financiero di e Gobierno actual pues saliente, a haci e ciudadanonan di e pais pober.
Medionan di Comunicacion Hulandes generalmente tabata di opinion cu e debatenan politico riba e cifranan Hulandes, tabata den cuadro di eleccionnan venidero y e poder di compra di e ciudadano Hulandes, cu a bira victima di e maneho di Gobierno Rutte.
Con awor Aruba, cu conoce un Gobierno cu a enfrenta e situacion financiero y a percura pa entrada di Aruba cubri gastonan pero tambe pa un maneho financiero cu hasta Caft ta aproba, mester firma pa Reino Hulandes formula un decision pa supervivion financiero na Aruba a base di RAft?
Informantenan clave ta mustra cu e debatenan den Parlamento Hulandes, caminda den cuadro di eleccion venidero tur berdad ta bini dilanti, ta habri porta pa un deseo di Aruba pa Ley di Aruba introduci supervision pa evita ripiticion di maneho di Mike Eman.
Gobierno Evelyn Wever-Croes mester sigui negocia cu tur espacio pa alcansa un decision husto di parti di Reino, informantenan a mustra.
