Awa y coriente central den crecemento di turismo pa un pais
- Awa y coriente aliento directo di hende y di su economia
- Porta industrial di Aruba habri cu hasta Merca den suspenso
ORANJESTAD(AAN)- E crisis mundial nobo orkestra pa prijs di petroleo, ta determina hasta decisionnan di Gobierno Mericano, cu ayera a dicidi cu no ta subi tazanan di interes pa bay contra inflacion, cu manera DIARIO a splica, ta bira e realidad mundial atrobe.
E shock nobo di petroleo ta di importancia directo pa tur prijs, pero tambe ta pone cantidad di pais na careda pa problemanan sumamente serio cu e maneho cu Gobierno Wever-Croes a hiba, ta evita.
Mundo a drenta un fase di transicion historico, den cual e calidad halto di bida di un cantidad di pais, ta expone e beneficionan special cu e paisnan aki a conoce.
Uno di e paisnan aki sigur ta Aruba, cu durante Siglo 20 a conoce un desaroyo enorme cu tur resultado cu esaki tin pa e calidad halto di bida mescos cu e loke a bira costumber y norma pa comunidad moderno.
E disponibilidad di awa y coriente na Aruba, ta sigur un prueba di e calidad halto di bida na Aruba, pero tambe esencial den atraccion di turismo y tur sector cu mester sostene economia di e pais.
Pa cantidad di bishitante, hasta di paisnan rico, e disponibilidad di awa y coriente na Aruba, ta impresionante y e forma cu ta atende cu awa y coriente na Aruba, algo excepcional.
Energia y awa limpi pa bebe, ta gastonan respeta na paisnan rico cu no por bebe awa cu ta sali di cranchi na cas y conoce uzo di coriente como uno di e gastonan mas halto riba lista di necesidadnan basico.
Cambio di clima a presenta na Aruba, e exigencia di realisa e balor di awa y coriente cu mester di energia pa wordo produci na momento cu produccion di energia a bira problema pa mundo.
E balor di petroleo pa hende, sigur tabata basa riba e forma cu e por a wordo uza pa genera energia y produci awa cu hende por bebe.
E plantanan moderno di awa y coriente na Aruba realmente ta un atraccion turistico pa Aruba, cu tabata permiti turistanan bebe “awa di laman” sin haci gasto cu nan tin na cas pa cumpra awa na boter y uza e awa di cranchi produci pa rieu pa otro tareanan.
Petroleo te awe ta motibo di guera na cantidad di pais na mundo, pero tambe e guera di naturalesa contra hende, cu mester bandona petroleo, di cual prijs di awa y coriente ta depende.
Den un mundo cu mester enfrenta retonan grandi cu salida di petroleo lo nifica, Ministro Glenbert Croes, ta papia di baha prijs di awa y coriente, na un momento cu petroleo kier regresa na 100 Dollar pa Baril den un mundo di conflicto y guera.
Paisnan desaroya, cu a planea pa e cambionan mundial, por papia di un momento di transicion cu mester hiba mundo na energia limpi, na formanan nobo pa produci awa y coriente.
Pakico Aruba por papia awe?
Pasobra atrobe Aruba por posiciona su mes riba lista di paisnan cu a desaroya y a prepara pa cambio cu mundo mester enfrenta.
Produccion di awa y coriente, salida di e epoca di petroleo, entrada pa e periodo di transicion cu gas pa asina yega na e proyecto pa hidrogeno den futuro, ta e ruta cu Gobierno Wever-Croes a sigui.
Mientras te awe tin pais, hasta den vecindario directo di Aruba, cu ta habri porta pa proyectonan pa refina petroleo, Aruba a sigui e caminda di paisnan grandi y desaroya manera na Europa.
Cu e acuerdo cu a wordo alcansa cu Eagle, Aruba ta bandona e azeta pisa industrial pa gas cu lo bira transicion di un futuro den cual hidrogeno ta uno di e alternativanan moderno, pa produccion di energia pa futuro.
Inversionnan mester wordo haci pero ya Aruba tin un base pa sigui cana, Un base cu tambe ta mustra mundo, cu e Gobierno di Aruba, actualmente dirigi pa Prome Ministro Evelyn Wever-Croes, no ta permiti awa seca den poz bashi ni den damnan cu cambio di clima ta afecta.
Ya a habri futuro di produccion di awa y coriente na Aruba, cu a entrega refineria di azeta na pasado pa sigui dilanti cu hidrogeno.
Diariamente prijs di petroleo ta entrega na mundo e guera cu ainda mester culmina, cu ta basa riba e salida di petroleo cu lo nifica perdida grandi pa paisnan exportador di petroleo.
Ora e bishitante di paisnan moderno yega Aruba, e por tuma nota di proyectonan cu ta splica cu Aruba por enfrenta e transicion di petroleo pa combustibel limpi, cu prijs di awa y coriente rasonabel, pero tambe di acuerdo cu e norma di paisnan cu un calidad halto di bida adapta na exigencianan di cambio di clima den un futuro nobo!
